10ê kanûna 2017î de Zanîngehê Kobanê amebi akerdene. Seba ke hûmara wendekaran zêdîyaye Îdareyê Xoserî 2021 de dest pê viraştişê bînayêka newîye kerd. Bînaya newîye 3yê adare de bi merasîmêkî dest pê xizmetan kerd.

Nika na bînaya Zanîngehê Kobanê de 25 sinifî û 35 odayê îdareyî est ê. Zanîngeh de Fakulteya Perwerde û Zanistî tewrê beşanê bînan bîye.

Wendekar û mamostayanê Zanîngehê Kobanê derheqê hîsanê xo de ANFyî rê qisey kerd.

Hemserekê Zanîngehê Kobanê Şervan Mislimî pare kerd ke Zanîngehê Kobanê 2017 de hêrişanê DAÎŞî ra dima dest pê perwerdekerdişî kerd û vat: ''Seba ke ma wendekaranê xo rê îmkananê holan pêşkêş bikerê na bîna akerde. Nika desî ra zêdeyêr beş û fakulteyê ma est ê û hûmara wendekaranê ma zî bîye hezar û 200.''

Mamostayê Beşê Cografya Mihemed Xanî da zanayene ke înan bi di mamostayan dest pê perwerdeyî kerdbî û vat: ''Ewro bi hezaran mamosta, wendekar û dibistanî ameyê awankerdene. Hewn û xeyalê ma raşt bîyî. Zanîngehêko winayên seba ma hewn bi la sayê şehîdanê xo ra ma hewnê xo ard ca.''

Wendekara Beşê Ziwan û Edebîyatê Kurdkî Şivîne Hecî vat: ''Ma akerdişê nê zanîngehî ra kêfweş ê. Babî û pîrikê ma tedayan ra nêeşkayî bi ziwanê xo perwerde bigêrê û înan tim xeyalê ziwanêkê azadî kerdêne. Ewro hewn û xeyalê înan ameyî caardene.''

Wendekara Beşê Ziwan û Edebîyatê Kurdkî Serbeste Bozan vat: ''Akerdişê Zanîngehê Kobanê çîyêko tarîxî yo. Wendişê bi ziwanê dayîke xeyalêk bi la xêrê şehîdanê ma ra xeyalê ma bi raştî.''