Têgêrayîşê Cinîyan ê Azadan (TJA) Amed de bi tewrbîyayîşê 700 delegeyan bi sloganê ''Ma cinî yê seba azadîya xo estê. Ma seba vurnayîşî payra yê'' vizêr dest pêkerd, konferansê xo yo 3. kerd. Konferans do ewro zî dewam bikero. Konferans de endamê rêxistinanê cinîyan ê Îngilîstanî, rêxistinê cinî yê Herêma Federale ya Kurdîstanî, dezgehê femînîstî, hemsereka Partîya Demokratîke ya Şaran (HDP) Pervîne buldan, hemsereka DBPyî Salîha Aydenîz, hemvervatoxa Kongreya Demokratîke ya Şaran (HDK) Îdîle Ugurlu, temsîlkarê dezgehanê sivîlan, endamê Meclîsê Mayanê Haştîye, Dadîya Fatma Uyara ke Silopî de ameye qetilkerdene Hatîce Uyar û zaf cinîyî tewrê konferansî bîyî.

Aktîvîstanê TJA ra Ayşe Gokkan, Zeynepe Urun û Fîgen Ektî ajansê ma reyde qisey kerd. Ayşe Gokkan vat: ''Serra 2019î de pêro dinya de têkoşînê cinîyan verê çiman de bîyî. Çimê pêro dinya têkoşînê cinîyanê Rojawanî ser o bîyî û dinya wayîrê nê şorişî vejîyaye. Ma têkoşînê azadîye danê û ma do qet azadîye ra fek vera nêdê. Heta cinîye azad nêba komel zî azad nêbeno. Ganî pêro cinîyî yewîya xo awan bikerê û vatişê xo bikerê yew.Ma konferansê xo de babetê azadîya cinîya, statuyê kurdan, yewîya neteweyîye û yewîya cinîyanê dinya ma ercnayî. Xora dejê ma yo bîn zî tecrîdê vera Birêz Ocalanî yo.  Dewlete wazena bi qirkerdişan verê destkewteyanê cinîyan bigêra. La ma do qet têkoşînê xo ra fek vera nêdê."

Aktîvîste Zeynepe Urun vat: "Ma wazenê dinya de rayberîya cinîyan bikera. Seba naye zî ganî ma rayîr û metodanê xo xurtêr bikerê. Cinîyî wayîrê erd, tarîx û rayberê xo vejîyenê. Dinya û b taybetî Tirkîya de vera destkewteyanê cinîyan hêrişî estê. Vera nê hêrişan xoverdayîş û yewîyêka cinîyan yanî TJA esta. Têna rayîrêkê serkewtişî esto û o zî yewîye û rêxistinbîyayîş o."

Aktîvîste Fîgene Ektî vat: "Her ca de hêrişê vera cinîyan estê. Verê cû nê hêrişî şenik bîyî la nika resayî bi mîlyonan cinîyan. Her cayê cuye de û warê sîyasetî de cinîyî ca gênê. Mîrasê xoverdayîşî yo ke ameyêne çinkerdene cinîyanê kurdan binê kerrayan ra vet û têkoşîn berz kerd. Ma sey cinîyî qet vera serdestan sereyê xo nêard war. Vera destkewteyanê ma hêrişî estê la ma do heta peynîye destkewteyanê xo bipawê. Bi taybetî îqtîdar Kurdîstan de vera cinîyan polîtîkayanê taybetan xebitneno. Bi rojan o Gulîstane vîndîbîyaye ya. Reyna cinîyî hetê leşkeran ra yenê tacîzkerdene. Vera nînan ma do têkoşînê xo berz bikerê û kiştoxan ra hesab bipersê."