'Peymana Konseya Ewropa ya Seba Tacîz û Tecawuzî ra Pawitişê Domanan' 10ê êlula 2011î ra nata Tirkîya de dewre de ya la vera tacîz, tecawuz û sûcanê cînselîyan ê serê domanan tehqîqatêko bitesîr nêno kerdene û ceza nêdîyena nê kerdişan. Peymana Lanzarote seba pawitişê domananê mexdûranê tacîz û tecawuzî peymana herêmî ya. Tirkîya rixmo ke morê xo dayo binê na peymane ro, aye nêana ca.

Hewteyê derbazbîyayeyî de bi mektuba ke JINNEWSî rê ameya erşawitene eşkera bi ke Mêrdîn de domanêke wextanê cîyayan de raştê tecawuzê hîrê kesan ameya, nê tecawuzan rê ci rê derguşêk bîyo la derguş merdo. Domana mexdûre bi sûcdarîya 'qestî ra kişîyayîşê dergûşî' 16ê çeleyî ra nata tepişte  ya. Bi testê DNA eşkera bi ke derguş tecawuzker N.Ç. ra yo. Domane teda û zorbazîyan ra îfadeyê xo yê verênî de qalê tecawuzî nêkerd. La îfadeyê diyînî de 20ê gulane de pare kerd ke N.Ç., M.Ç. û M.S.O.yî tecawuzê ci kerdo. La nê kesî seba ke 'delîlê qîmî' çin ê vera dîyayî. TJA û Platformê Cinîyan ê Şahmarane ya Mêrdînî seba paştdayîşê domane veng da. Nînan vist vîrî ke Tirkîya goreyê Peymana Lanzarote tênêgêrena.

Goreyê doneyanê Wezîrîya Edaletî 2023 de sûcê 'tacîz û tecawuzê vera domanan' ra 40 hezar û 713 dosyayî ameyê amadekerdene. Mehkemeyan derheqê 344 kesan de tecawuzî ra bira 'taloqkerdişê eşkerakerdişê hukmî' daya. Dozgerîya komare sûcê 'têkilîya cînsele ya bi domanan' ra 23 hezar û 390 tehqîqatê neweyî dayî destpêkerdene la reyna 21 hezar û 101ê nînan de gumanbarî ameyî tesbîtkerdene. Goreyê Peymana Lanzarote ganî nê dewa û tehqîqatan de cezayê qîmî biameyêne dayene.

Peymana Lanzarote peymana verên a ke seba pawitişê domananê mexdûranê tacîz û tecawuzî ameya amadekerdene. Peymane 25ê teşrîna verêne ya 2007î de bi beşdarîya welatanê endamanê Yewîya Ewropa ameye qebulkerdene û 2010 de  hetê Konseya Ewropa ra ameye îmzakerdene. Tirkîya zî peymane îmza kerde.

Peymane 13ê tebaxa 2010î de pêşkêşê Serekîya Meclîsê Tirkîya ameye kerdene. Serekwezîrê ê çaxî Erdoganî 18ê temmuza 2011î de bire daye ke Tirkîya tewra peymane biba. 'Peymana Konseya Ewropa ya Seba Tacîz û Tecawuzî ra Pawitişê Domanan' 10ê êlula 2011î de kewte dewre la nêna caardene.