9ê çeleyê 2013î de ronayoxa PKKyî Sakîne Cansiz (Sara), Temsîlkara KNKyî ya Parisî Fîdane Dogan (Rojbîne) û Endama Têgêrayîşê Ciwanan Leyla Şaylemez (Ronahî) Paris de ameybî qetilkerdene. Kiştox Omer Guney 17ê kanûna 2016î de bi hawayêkê şikdarî zîndanê Fransa de merd. Qirkerdiş de rolê hemkarê Guneyî Rûhî Semeno ke Almanya de yo nêame eşkerakerdene.

ANFyî çend rojî verî tesbît kerd ke Semen reyna agêrayo Almanya û dezgehê MÎTî DITIB de xebitîyeno. Parlamentera Partîya Çepe Ulla Jelpkeya ke verî zî derheqê Omer Guneyî de xeylêk vernîyazî pêşkêşê hukmatî kerdî pare kerd ke ê mat mendî ke senî Semen hema zî DITIB de karê xo dewam keno.

Jelpke derheqê babete de cewab da persanê ANFyî û ard ziwan ke dezgehê Dîyanetî yê Tirkîya DITIB bi serran o sey merkezê MÎTî xebitîyeno.Jelpke îfade kerd ke Almanya û Fransa vera qirkerdişî bêveng ê û tena pê xîretê çapemenîya kurdan tehqîqat dewam keno.

Jelpke vist vîrî ke Omer Guney wextêk Almanya de mend û komanê nîjadperestan ê Tirkîya de ca girewt coka Almanya na babete de têbigêra. Parlamentera almane waşt ke seba ke hemkarê Qirkerdişê Parisî bêrê eşkerakerdene dewleta almane ra teda bêra kerdene. Jelpke vat: ''Heta teda nêba Almanya tênêgêrena. ''

Parlamenterê Partîya Çepe Gokay Akbulutî zî rewşa Semenî vist rojdemê Meclîsê Federalî. Akbulutî bi vernîyazêkî persa ke xîretê remnayîşê Omer Guneyî de rolê Semenî estbî yan nê, Almanya îfadeyê ci girewto, Semen hemwelatîyê Almanya yo na nê.