Xelata Sakharove ya seba Azadîya Fikran a Parlamentoyê Ewropa (PE) bi merasîmêkî şexsê Jîna Emînî de dîyaye Têgêrayîşê Jin, Jiyan, Azadî.

Keyeyê Jîna, avûkat Salîh Nîkbeht, pawitoxê heqanê cinîyan Efsune Najafî û Mersedehe Şahînkar zî tewrê merasîmî bîyî. Merasîm Strasbourg de bînaya PE de ame kerdene.

Merasîmî ra ver di kombîyayîşê çapemenîye ameyî kerdene.

Sereka PE Roberta Metsola kombîyayîşê yewinî de qisey kerd û vat: ''Xelata Sakharove emser layiqa vîrameyîşê Jîna Emînî û Têgêrayîşê Jin, Jiyan, Azadî ameye dîyene. PE paştî dana nê têgêrayîşê cinîyan.''

Kombîyayîşê bînî de Koma Xelata Saharove ra Hadidiye Hautala qisey kerd û vat: ''PE do tim paştî bidê kurdan û cinîyan ê kurdan.''

Avûkat Nîkbehtî nameyê keyeyê Jîna Emînî ser o qisey kerd û mesajê dadîya Jîna wend. Mesaj de dadîye vana ke ê hêvî kenê ke serewedaritişê cinîyan ser bikewo.

Cinîya kurde Jîna Emînî êlula 2022yî de seba ke gijikê ci asayêne hetê 'Polîsanê Exlaqî' yê dewleta Îranî ra amebî qetilkerdene. Naye ra dima sere de Rojhelatê Kurdîstanî de pêro cayanê Îranî de cinîyan serewedaritişê 'Jin, Jiyan, Azadî' dabi destpêkerdene.

Dewleta Îranî destûr nêda ke keyeyê Jîna Emînî tewrê merasîmê Xelata Sakharove bibo û dest nabi pasaportanê keyeyî ser.