Endamê Konseya Rayberdişî ya KCKyî Mustafa Karasuyî Medya Haber TV de rojdem ercna. 

Qiseykerdişê Karasuyî ra tay noqtayê girîngî wina yê:

''Embaze Besê Xozat eşkera kerd ke dewlete seba pêvînayîşê bi Rayber Apoyî tawîzan wazena. Ma nê agahîyî ser o hêrs bîyî. Dewleta tirke dewleta şantajan a. Dewlete zanena ke ma waştişanê ci qebul nêkenê. Aseno ke nîyetê dewlete çin o destûr bida pêvînayîşan. La dewleta tirke zî nika zorî ancena. Dewlete wina mojnena ke PKK verê pêvînayîşan de asteng o. La çîyo winayên çin o. Seba ma babetêka tewr hesase babeta Rayberîye ya.

Heta nika têgêrayîşê ma zî şarê ma zî asta tewr berze de wayîrê Rayberîye vejîya coka ewro CPT hende zorîye anceno. Seke embaze Besê vat têgêrayîşê ma tewirê xo rê do dewam bikero. Ma do seba azadîya Rayberîye tim têkoşîn bikerê. Dewleta tirke Ewropa de kombîyayîşan de tecrîd înkar kerd û îdîa kerd ke teyna cezayê dîsîplînî est ê. Nê cezayê dîsîplînî zî bahane yê.

Dewleta tirke teng bîya. Ma do aye hîna teng bikerê; her ca de têkoşînê xo rê dewam bikerê. Têkoşînê seba azadîya Rayber Apoyî û têkoşînê azadîya kurdan yew ê. Seke embaze Besê vat ma do têkoşînê xo berzêr bikerê û Rayber Apoyî azad bikerê.

Xoverdayîşê Zîndanî yê 14ê Temmuze zaf kede daye têkoşînê ma. O çax şarê ma ameyêne tersnayene la zîndanan de îtîrafkerîye ameyêne ferzkerdene. Xoverdayîşê 14ê Temmuze vera nînan yew cewab bi. 14ê Temmuze hêz da têkoşînê ma, felsefeya têkoşînê ma awan kerd. Xeyrê ruhê xoverdayoxîya 14ê Temmuze ra ewro ma têkoşînê xo rê dewam kenê.

3yê temmuze ra nata vera Metîna û Zapî hêrişê îşxalî zêdîyayî. Gerîlayê ma bi moral û motîvasyonî xo ver danê. Dişmen bi çekanê kîmyewîyan û gazanê jehrînan hêriş keno la embazê ma bi qehremanî verê nê hêrişan gênê. Ganî şarê ma bi nê ewladanê xo sereberz bibo.  

Dewleta tirke hîrê serran ra nata bi pêro îmkananê xo hêrişê Herêmanê Pawitişî yê Medya kena. 3yê temmuze de hêrişî resayî asta newîye. Dişmen vano 'Ma do kilîdî bişiknê.' Yanî PDK zî tewrê hêrişanê înan bîyo. Ewro Bamernê, Amedîyê, Dêrelûk, Şêladizê de dewleta tirke serdest a.PDK destek dano hêrişan. PDK nê hêrişan de rolanê pîlan ano ca. PDK tedaya Iraqî zî keno ke wa hetê dewleta tirke de cabigêro. Seba PDK hîrê-çar şaristanî bes ê. PDK tim dewleta tirke çi biwaza o qayde keno. 

Oyo ke PDK keno îxanet o. Ganî vera nê îxanetî sere de şarê Başûrî şarê pêro parçeyanê Kurdîstanî tewirê xo bimojnê. Bi taybetî hunermendî, roşnvîrî ganî tewirê xo vera îxanetê PDKyî bimojnê. PDK ewro verê yewîya neteweyîye de asteng o.

Şero giran 10 serrî verî bi tecrîdê girankerdeyî dîya destpêkerdene. Nê 10 serran de ganî no biameyêne musnayene ke şerê vera kurdan şerê vera hêzanê demokrasîyî yo. Nê şerî rîyê her kesî yo raştikên zî eşkera kerd. Nê 10 serran de ma têkoşînêko pîl kerd. Ewro zî nê hêrişî bêmanênî dewam kenê. La hesabê dewleta tirke zî pûç bîyî.

Ez serrgêra Şorişê 19ê Temmuze fîraz kena. Şorişê Rojawanî destkewteyêko pîl o. Nê şorişî de fikrê Rayberîye pratîze bîyî. Rojawan bi serkêşîya cinîyan tesîrê pêro dinya keno û kedêka pîle dano mîrasê merdimatîye. Coka dewleta tirke dişmena nê şorişî ya. 

Erdogano ke Sûrîye îşxal kerda û Esad tehdît kerdbî ewro gêreno ke Esad de pêvînayîşan bikero. Çunke polîtîkayê Erdoganî bin kewtî. Erdogan bi xo nêeşka heqê kurdan ra bêro coka verê xo da Esadî. La Esad zî derdê Erdoganî zaneno. Esad eke dişmenîya kurdan bikero do bin bikewo. Ganî rejîmê Şamî kurdan de dîyalogan virazo û bi nê hawayî  meseleyanê xo çareser bikero.''