Bi vengdayîşê CDK-F û TJK-Fyî paytextê Fransa Paris de vera tecrîdê serê Rayberê Şarê Kurdî Abdullah Ocalanî û polîtîkayanê şerî yê dewleta tirke yê vera Kurdîstanî mîtîng ame kerdene.

Eşkerayîye de nê ameyî vatene: ''Semedê şiknayîşê tecrîdê serê Rayber Apoyî û azadkerdişê ey 10ê teşrîna verên a 2023yî de hemleya 'Rayber Apoyî rê azadîye, meseleya kurdan rê çaresrîya sîyasîye' dîyaye destpêkerdene

Bi seyan kurdîstanijî  û dostê înan tewrê mîtîngî bîyî. Mîtîng de semedê Şehîdanê Azadîye yê Kurdîstanî rêz ame girewtene. Dima qiseykerdişî ameyî kerdene.

Bi nameyê TJK-Fyî Hemsereka CDK-Fyî Xanê Akdogan qisey kerd. Akdogan vist vîrî ke 42 mengî yo Rayberê Şarê Kurdî Abdullah Ocalanî ra qet xeberêk nîna girewtene û nê vatî:  ''No tecrîd têna vera Rayberîye nîyo, vera ma pêrune yo. Tecrîd çarçewaya konseptê qirkerdişî de yeno rayraberdene. Hetê bînî ra bi destê xayînan Kurdîstan yena îşxalkerdene.  Şervanê Azadîye vera hêrişê îşxalî û çektanê kîmyewîyan têkoşînê biheybetî danê. Îşxalkerî û paştgêrê înan do bin bikewê.''

Hemserekê CDK-Fyî Şahîn Polat zî nê vatî: ''Semedê îşxalî her hetê dinya ra çeteyî kom kerdî, hêzê mîyanneteweyî girewtî peyê û pîya bi hemkaranê xo yê herême hêriş kenê. Wa hêrişkarî bizanê ke ma do çirey peyser game meerzê. Dezgehê sey CPT û Konseya Ewropa muracatanê ma ser o nêvindenê. Ma tîya ra reyna vanê ke; heta rijnayîşê sîstemê îmraliyî û çareserkerdişê meseleya kurdan ma do meydanan de bê.''

Çalakîye badê qiseykerdişan bi slogananê “Bimre Xiyanet” û “Bijî Serok Apo” qedîyaye.