Kadroyê serkêşî yê PKKyî Riza Altun û Alî Haydar Kaytan Paris, Koln û Fribourg de bi merasîmanê heybetînan ameyî yadkerdene.

Şaristanê Parisî yê Fransa de merasîmêk ame kerdene. Merasîm de nameyê Rayber Apoyî, KCK, KJK, meclîs û komeleyanê Fransa ser o çelengî ronîyayî. Hemserekanê FCDK-BF Azad Dogan û Fevziye Erdemîrcî merasîm de îfade kerd ke ê hem hêrsbîyaye hem zî xemgîn ê. Dima şîîrê Alî Haydar Kaytanî ameyî wendene.

Embaza Kaytan û Altunî Sakîne Karakoçan îfade kerd ke nê wird kadroyî zî wayîrê kedanê pîlan bîyê û tim perwerê Rayberîye bîyê. Waya Riza Altunî Zohre Altun ard ziwan ke ê do têkoşînê birayê xo û şehîdan bivisnê serî. Waya Kaytanî Selma Kaytan pare kerd ke ganî ê bi qerardarî rayîrê şehîdan teqîb bikerê.

Endamê Konseya Rayberdişî ya KCKyî Zubeyîr Aydarî vat ke Kaytan û Altun seke abîdeyê têkoşînê PKKyî bîyê.

Qiseykerdişan ra dima Hemserekê CDK-Fyî Şahîn Polatî şîîra Cuma Takî ya serê Alî Haydar Kaytanî û şîîra Kaytanî wendî.

Şaristanê Fribourgî yê Swîsre de Merkezê Komelê Demokratîkî yê Kurdan (NCDK) de merasîmêk ame kerdene. Hemserekê NCDKyî Orhan Hazarî yadkerdiş de qisey kerd û bale ante têkoşînê wird şehîdan ser. Yadkerdiş bi slogananê sey "Şehîd namirin", "Bijî Serok Apo" û "Jin, Jiyan, Azadî" qedîya.

Şaristanê Kolnî yê Almanya de roja çarine de serweşîyan dewam kerd. Tazîya de Federasyonê Elewîyanê Demokratîkan werd vila kerd. Vervatoxa FEDA ya Swîsre Songule Çelîk yadkerdiş de îfade kerd ke ê do qetî fedakarîya şehîdan vîr a nêkerê.

Serekê Têgêrayîşê Îslamî Ahmet Hafiz Turhalliyî zî vat ke têkoşînê PKKyî 52 serran tarîxêk nuşt. Sîyasetmedar Pero Dundarî vat: ‘’Wa sereyê Rayber Apoyî û şarê ma weş bo.’’