Hemserekîyanê KCDK-E û TJK-E bi eşkerayîyan venga pêro kurdîstanijan û dostanê înan da ke 25ê hezîrane de seba pawitişê Kurdîstanî tewrê rayraşîyayîşê Dusseldorfî bibê.

KCDK-E vat: ''Artêşa tirke ya îşxalkere hêrişê Başûr û Rojawanê Kurdîstanî kena. Îqtîdarê AKP-MHPyî vera kurdan sûcê şerî keno û vera gerîlayan gaz û çeka kîmyewîye xebitneno. Seba ke ma sûcanê dewleta tirke eşkera bikerê do pê şîarê 'Kurdîstanî Bipawê' rayraşîyayîşê Dusseldorfî de vengê xo berz bikerê. Ma venga pêro kurdan, roşnvîran, demokratan, pawitoxanê heqanê merdiman, şarê Ewropa, sosyalîst û şorişgêran danê ke tewrê rayraşîyayîşî bibê.''

TJK-E vat: ''Gerîlayê azadîye hê Zap û Avaşîn de vera hêrişanê artêşa tirke xoverdayîşêkê pîlî kenê. No xoverdayîş wayîrvejîyayîşêkê pîlî heq keno. Ganî cinîyê kurdî, cinîyê têkoşerî û pê kesî bibê pawitoxê nê xoverdayîşî. Ma venga pêro cinîyan, meclîsanê cinîyan, rêxistinanê cinîyan danê ke bi şîarê 'Nika wext wextê pawitişê Kurdîstanî yo, wext wextê rayraşîyayîşê xoverdayîşî yo' biherikîyê Dusseldorfî.''