Hemserekîya Konseya Rayberdişî ya KCKyî vera tepişîyayîşê Hemsereka KCDyî û Wekîla Colemêrgî  Leyla Guven bi eşkerayîyêke  nêrazîbîyayîşê xo mojna.

Eşkerayîye wina ya:

''Wekîl, hemşaredar, îdarekarê HDPyî û bi hezaran sîyasetmedarî zîndan de yê. No dişmenîya vera kurdan nîşan keno. Tarîxê Tirkîya de reya verêne hende sîyasetmedarî tepişîyayî.

Tepişîyayîşê Leyla Guven reyna pêro raştîya îqtîdarî bi hawayêkê zelalî eşkera kerde. Kerdişê ke ê tira vanê 'reform' nê tepiştişî yê. Beno ke ê do 100 tepişteyan ra 5 tenî raverdê û vajê 'ma reform kerd.' Pêro dinya de warê bêedaletîye de Tirkîya asta yewîne de ya. Ê tira tersenê ke peynîya nê bêedaletîyan do xirab biba coka ge ge qala reformî kenê.

Îqtîdarê AKPyî vera her kesî şerê taybetî keno û merdiman rê ferz keno ke ya paştî bidê ci yan zî bedelê ci bidê. Îqtîdar vera HDP û sîyasetmedaranê demokratîkan teda keno, teslîmîye ferz keno û seba ke înanê ke nê tedayan qebul nêkenê tepişeno.

Leyla Guven seba ke wayîrê rûhê azadî bîye û sîyasetê demokratîkî de israr kerd tepişîyaye. Leyla Guven seba ke bi qerardarî serra 2018î de vera tecrîdê Îmraliyî tewra rojeyê mergî bîye yena cezakerdene. No tepiştiş seke qesasê înan o. Seba ke reyna tepişê înan Guvene vera daye û coka dest nîya wekîlîya ci ser. Seba ke Leyla Guven perwera Rayberê Şarê Kurdî bîye û seba azadîya ey xebitîyayêne tepişîyayîşê aye komelê kurdan û cinîyan ê kurdan rê gef o.

Tirkîya de merdimî goreyê huqûqî nê goreyê waştişanê Erdogan û Bahçelîyî tepişîyenê û ceza gênê. Xora zanîyeno ke Osman Kavala û Selahattîn Demîrtaş senî zîndan de tepişîyenê. Verî wexto ke MHME waşt ke Selahattîn Demîrtaş bêro veradayene Erdoganî vatbi ke ê do Demîrtaş zîndan de tepişo. Tirkîya de hîkayeya pêro tepiştişan wina yo. Erdoganî îtîraf kerdbi ke seba înan oyo girîng fikirîyayîşê înan o.

Bi nê hawayî Leyla Guven rê ame vatene ke 'eke ti wayîrê Rayberîye vejîya û vera tecrîdî têbigêra ma to rê wina kenê.' Ganî pêro cinîyê kurdî, hêzê demokrasî û şarê kurdî wayîrê Leyla Guven vejîyê û seba ke tecrîd wedarîyo têkoşîn berz bikerê. Heta ke vera tecrîdê Îmraliyî têkoşîn nêro kerdene verê nê qirkerdişanê sîyasîyan zî nêeşkîyeno bêro girewtene. Ganî tepişîyayîşê Leyla Guven bibo wesîleya berzkerdişê têkoşînî.

Nika wextê ci yo ke ma vera faşîzmî têkoşîn pîl bikerê û azadîye bîyarê ca. Çareserîya meseleya kurdan û demokratîkbîyayîşê Tirkîya pê rijîyayîşê îqtîdarê AKP-MHPyî benê. Qala reformî ya nê îqtîdarî xapînayîş o. Êyê ke nê îqtîdarî ra çîyêk pawenê têna emrê ci kenê derg. Nê esasî ser o ma venga pêra hêzanê demokrasî, cinî, ciwan û şarê kurdî danê ke têkoşîn berz bikerê, peynîya faşîzm û tecrîdî bîyarê.''