Berpirsîyara Dîplomasîyî ya KJARî Rozerîne Kemanger serewedaritişê şarî yê Rojhelat û Îranî yo ke badê qetilkerdişê Jîma Emînî dest pêkerd, ercna.

Kamengere bale ante serewedaritiş û protestoyanê Îran û Rojhelatî ser û vat: ‘’Cinîyan reyna vera rejîmî sere wedarit ke heqanê xo bigêrê. Zîhnîyeto ke dişmenê cinîyan o cinîyan nêpaweno. Rojhelat û Îran de cinîyî raştê her qeyde şîdetî yenê. Nê welatî de zafê cinîyan xo kişenê, yenê kiştene. Zîndanî pê cinîyan pirrkerdeyê ke wayîrê heqanê xo vejîyenê. Îran de cuya cinî ne keye, ne kuçe û ne zî mîyanê komelî de binê asayîşî de yo.

Hewteyo ravêrte Şîlere Resûlî Merîvan de gama ke kerdêne ke xo hêrişê tecawuzê wezîfedarê îstîhbaratê Îranî ra bixelisno katê dîyinî yê keyeyî xo ra xo eşt war û dinyaya xo bedilnaye. Dima ra Jîna Emînî Tahran de ameye qetilkerdene. Çîta bimecbûrî bîya sebebê têkoşînî yê cinîyan ra yew. Rejîmê Îranî komelî rê û bitaybetî cinîyan rê zaf çî ferz keno.  Cinîyî keye de yenê hepskerdene, yenê qetilkerdene, domanîya xo de yenê zewijnayene. Rewşa winayêne de ganî çew senî qala heqê cinîyan bikero.

Eke yew komel azad o qey sere wedaren o?  Nê des rojanê peyênan de bi des hezaran cinî û camêrdî wiriştî payan ser. Nê serewdaritişan Merîvan de dest pêkerd, resayî Tahranî. Têna Kurdîstan de nê heme Îmran de cinîyî raştê hêrişî yenê. Bitaybetî serranê peyênan de Îran de hetê cinîyan û komelî ra protesto û serewedaritişî benê. Rojehelatê Kurdîstanî û Îran de potansîyelo xurt ê cinîyan est o. Eke rejîmê Îranî kuçeyan bikero cayê hêrişî ma cinîyî zî her cayî açarnenê cayê têkoşîn û serwedaritişî. Cinî zanê ke semedê heqanê xo ganî bedalanê girdan bibê. Hinî sîstemî ra tiway nêpawenê. Coka wazenê ameyoxê xo bi destê xo înşa bikerê. Çalakîyê cinîyan hêrs û xirsê 45 serranê peyênan o.

Tarîxê Kurdîstanî ra nata bi hezaran serran o ke cinîyî komelî îdare kenê. Cinîyî bîyî hêvîya cuye ya komelî. Cinîyan cuye pawite û bingeyê ehleqî ard ra. Bi hezaran serrî cuwa pê, cinîyê ke pê eynî slogane qîrêne mojnenê ke çimeyê cuye cinî ya. Nika slogana "jin, jiyan, azadî"  heme dinya de bena berze. Peyê nê hîrê çekuyan de felsefeyêka girde est a. Nê sloganî têna Kurdîstan de nê heme bajaranê Îranî de hem kurdkî hem zî farskî ameyî eştene. Heta cinî azad mebo, komel nêeşkeno bibo azad. Cinîyî hinî xo pawenê, têkoşîn kenê û qurbanbîyayîşê sîstemî red kenê. Şar nê sîstemî ra razî nîyo û vera ci bêveng nêmaneno. Nika çîyo tewr muhîm ma paştî bidê yewbînan. Vera serdestîya camêrdan ganî cinîyê serkêşîye bikerî, paştî bidê yewbînan. Semedê rijnayîşê nê sîstemî ganî ma bibê yew û heqanê xo bigêrê. Semedê cuyêka azade eke hewce bikero ma ganê xo zî feda kenê.’’