Qezaya Kercewsî ya Êlihî de domanêka 15 serre leşker, polîs û qoricîyî zî tede maruzê tecawuzê 27 kesan mende. Hemsereka Komeleya Heqanê Merdiman (ÎHD) Eren Keskîn zî waşt sey avûkate beşdara dewaya tecawuzê Kercewsî biba. Keskîne zêdîyayîşê hêrişan ê cînsîyan ê vera doman û cinîyan ANFyî rê ercna.

Keskîne îfade kerd ke zaf domanê kênayî û cinîyê ciwanî maruzê tacîz û tecawuzî benê la şermî ra muracatê dezgehan nêkenê. Keskîne vat: ''Cinîyan rê hîşmendîya mîlîtarîst, feodal, serdeste ya camêrdan yena ferzkerdene coka cinîyî şîdetê cînsîyî nimnenê.''

Keskîne ard ziwan ke sebebo esas ê şîdetê cînsî yê dewlete bêcezaverdiş o. Keskîne da zanayene ke serra 1997î ra nata dewayanê tacîz û tecawuzê unîformakerdeyan de têna 2 qoricîyan ceza girewte. Keskîne vat ke bêcezaverdiş polîtîkayêka dewlet a.

Keskîne serebûtê Îpeke Er vist vîrî û vat: ''Çawişo pisporo ke tecawuzê Îpeke Er kerd rixmê delîlan zî ame veradayene. Kişîyayîşê cinîyan naye ra polîtîk ê. Çunke eke şima pêro sûcê camêrdêkî mîyan bikerê, ceza nêdê ci şîdetê vera cinîyan zî zêdîyeno. Hêzê dewlete coka hende rehet sûcan kenê. Çunke ê zanenê ke do ceza nêgêrê. Bi nê hawayî şîdet pê destê dewlete yeno meşrûkerdene. Serebûtê Kercewsî zî ganî wina bêro ercnayene.''

Keskîne eşkera kerd ke hêrişê cînsî yê dewlete bi taybetî Kurdîstan de zêdêr ê û vat: ''Rewşa şerî de hêverî cinîyî benê hedef. Sûcdarî Kurdîstan de seba sûckerdişî xo hîna rehet hîs kenê. Çunke goreyê înan cinîyê kurdî cara dişmen ê. Bi veradayîşê Musa Orhanî no mesaj dîya.''

Erene Keskîn pare kerd ke Tirkîya peymanê ke cinî û domanan pawenê nênê caardene û vat: ''Tirkîya têna nê peymanan bîyara ca bes o. La seba ke Tirkîya dewleta huqûqî nîya nê peymanan zî nêana ca.''

Erene Keskîn vera bira nimite ya seba tecawuzê Kercewsî nêrazîbîyayîşê xo mojna û vat: ''Dosya avûkatan rê qefilîyaye û rayaumûmîye ra ameye mîyankerdene. Dosyaya Nadîra Kadîrova, Îpeke Er de zî wina ame kerdene. Nika zî dosyaya Kercewsî yena mîyankerdene.''