Wendekara Zanîngehê Munzurî Gulîstane Doku 5ê çeleyê 2020î ra nata vînîbîyaye ya. Keyeyê Doku ya ke tira xebere nîna girewtene verê Edlîyeya Dêrsimî de çalakîya nobete daye destpêkerdene. Çalakîye vizêr roja 13. de ameye domnayene.

Dayîke Bedrîye, babî Halît Doku û waye Aygule Doku pîya bi fotografanê kênaya xo Gulîstane Doku ameyî verê banê edlîye û aqibetê kênaya xo persayî. Endamanê Meclîsê Cinîyan ê HDPyî keyeyê Doku zîyaret kerd û paştî daye ci. Keyeyê Doku badê çalakîya roniştişî şi verê banê walîtîye û tîya eşkerayîye daye.

Eşkerayîye de ame vîrvistene ke semedê vînayîşê Doku cipersayîşo xurt nêame kerdene û ame vatene ke seba ke Meclîs de  semedê vînayîşê Gulîstane Doku Komîsyonê Cigêrayîşî bêro ronayene înan 600 wekîlan rê mektûbe şawite. Keyeyî bale ante ser ke înan verî zî waşt bi wa komîsyono winayên bêro ronayene la bi reyanê AKP û MHPyî ame redkerdene û vat heta ronayîşê komîsyonî çalakîya înan do dewam bikero.