Nêweşxaneyê Cigêrayîş û Perwerdeyî yê Yedîkule de doktor S.E. tecawuzê hemşîreya nobetdare kerdbî. Gerreyê hemşîre ser o S.E. amebi destbendkerdene la dima vera dîyabi. Dewaya vera S.E. de zî bira veradîyayîşî dîyaye.

Sekretera Cinîyan ê Sendîkaya Kedkaranê Xizmetanê Komelkîyan û Weşîye (SES) a Şubeyê Bakirkoyî Sevgîye Kizilirmak pare kerd ke cinîyî her warê weşîye de benê hedefê mobbing û hêrişanê cînsîyan. Kizilirmake vat: ''Nê serebûtê tecawuzî de zî xîret ameyo kerdene ke serebût binimîyo. Warê weşîye de asayîşê cinîyan çin o. Nê serebûtî de ma hende xîret kerd ke vengê xo bidê eşnawitene. Îdareyê nêweşxaneyî zî ne tehqîqatêk akerd ne zî doktor karî ra vet.

Sîstemê weşîye se ra 65 hetê cinîyan ra yeno pê la rixmê ney zî îrade bi temamî destê camêrdan de yo. Zaf zehmet o ke cinîyî mîyanê îdareyî de est bê. Warê weşîye de kerdişê xirabî, teda, şîdet, tacîz û tecawuzî zêde yê. Goreyê cigêrayîşan û gerreyan se ra 70ê nêweşxaneyan de serebûtê winayênî qewimîyenê.''

Kizilirmake da zanayene ke vera feraseto ke camêrdan paweno û vera polîtîkayanê bêcezaverdayîşî ganî ê bi hawayêkê topyekûnî têkoşîn bikerê. Kizilirmake vat: ''Warê ma yê erkî asayî nîyê. Kedkarê cinîyî heyf ke nobete de şewe raştê hêrişanê cînsîyan yenê. Wexto ke gerreyê nê kerdişan yenê kerdene zî  mehkemeyî camêrdan pawenê. Teyna ma eşkenê nê tewirê mehkemeyan bivurnê. Bi rêxistinîyêka hîna xurte, bi têkoşînêkê hîna pîlî, bi teşhîrkerdişê biranê winayênan ma eşkenê waranê xo yê cuye asayî bikerê.''