Aktîvîsta heqamê merdiman û endama Komelê Cinîyan ê Azadan ê Rojhelatê Kurdîstanî (KJAR) Werîşe Muradî panc rojî verî, Roja Vera Cezaya Îdamî ya Dinya de vera cezaya îdamî û rewşa tepişteyanê sîyayan dest pê grevê vêşanîye kerd.

Werîşe Muradî mektubêke şawit û da zanayene ke aye vera teda û dardekerdişî dest pê grevê vêşanîye yê bêwextî kerdo.

KJARî derheqê Werîşê Muradî de eşkerayîye daye û nê vatî: ''Rejîmê Îranî netewe-dewletan ra yew o ke bi serran o muxalefetê zereyî keno bêveng , şero ke teberê welatî ra vila bîyo, domneno. No sîyasetê zîhnîyetê camêrdê serdestî yo ke waştişê ci înşayê îqtîdarî yo. Na çarçewa de menfeatê dewletê verê menfeatê şar û komelî de yê. Na dewleta ke rojane bi fetvayan, qanûnan û  projeyanê neweyan yena îdarekerdene,  wazena îradeyê komelkî çîn bikero û şarî bikero beveng. Dewlete seba ke payra bimano şîdet û rişnayîşê gonî sey metodêkî şuxilnena. Îqtîdar yewîya şaran û bitaybetî vengê cinîyan ra yê ke zîndan de yê, terseno.

Parna zext û cezayê îdamî zêdîyenê la nê zext  û îşkenceyî tesîrê cinîyan ê xoverdayoxan ê ke zîndanan de yê, nêkerd. Hemraya ma Werîşe Muradî cinîyan ê serkêşan ra yew a ke payîzê 2023yî de ameye tepiştene û nika Zîndanê Evînî de ya. Embaza ma raştê înkeceyê psîkolojîkî yena û ne keye ne zî avûkatanê xo reyde eşkena pêvînayîş bikero. La rixmê îşkence û zextanê ke tim zêdîyena a tim cehd kena ke vengê xo û vengê tepitşeyanê sîyasîyan ê bînan komelî rê bido eşnawitene. Xeylêk reyî vera cezaya îdamî derheqê Şerife Muhammedî û Pexşane Ezîzî de mektûbî nuştî û pîya bi heme cinîyan vera îdamî vejîyaye.  Coka Roja Vera Cezaya Îdamî ya Dinya de vera cezaya îdamî û rewşa tepişteyanê sîyayan dest pê grevê vêşanîye kerd.

 Hemraya ma Werîşe Muradî vengê komelî ya. Bitaybetê vengê cinîyan ê kedkaran ê ke tim raştê hêrişê rejîmê îslamî yê Îranî yenê û eynî wextî de vengê heme cinîyan a ke semedê azadîye têkoşîn kenê. Ma sey Komelê Cinîyan ê Azadan ê Rojhelatê Kurdîstanî veng danê heme cinîyan ê aktîvîstan, xoverdayoxan, komelanê ke azadîye wazenê, dezgeh û sazgehanê neteweyî û mîyanneteweyî: Paştî bidê hemraya ma, bibê vengê şarî. Seba ke sîyaseto zalim o ke bi cezaya îdamî yeno rayraberdene bêro qêdînayene,destûr medê ke  sûcê rejîmê îslamî yê Îranî teberê welatî de binê nameyê şerî de bêrê nimitene.''