KJKyî bi wesîleya serrgêra Qirkerdişê Parisî eşkerayîye daye.

Eşkerayîye wina ya:

''Ma hê dekewenê serra 8. ya qirkerdişê vera Şorişgêra pîle, hemraya Rayberê Apoyî û temsîlkara nasnameyê cinîya azade Sara (Sakîne Cansiz), pawitoxa erj û kokan Rojbîne (Fîdane Dogan) û Ronahî (Leyla Şaylemez). Nê qirkerdişî armanc kerdbi ke derbe bido têkoşînê rêxistinbîyayeyî yê îdeolojîya azadîya cinîyan, raştîya Rayber Apoyî biqedîno. No qirkerdiş hetê MÎT û Erdoganî ra ame rêxistinkerdene û vera şaran, cinîyan û raştîya kurdan ê azadan ame kerdene. Bi na hîşmendî û bi qerardarîya hesabpersayîşî şexsê embazanê xo Sara, Rojbîne, Ronahî, şexsê embazanê xo Sêvê Demîr, Pakîze Nayir, Fatma Uyar ê ke 5ê çeleyê 2016î de ameyî qetilkerdene û şexsê Zîn Cizîre, Leyla Agirî de pêro şehîdanê azadîye bi minet û rêzdarî yad kenê û vîrameyîşanê înan ver de sereyê xo anê war.

Cinîyê kurdî pê paradîgmaya demokratîke ya Rayber Apoyî rayberîya têkoşînî kenê û vera hêzanê hegemonîkan Şerê 3. yê Dinya de ca gênê. Hêzê dewletgîrî, îqtîdargîrî û serdestîya camêrdan tecrîdê Îmraliyî anê ca, Vakurê Kurdîstanî pê dewleta faşîste pelixnenê, Şorişê Rojawanî asteng kenê, pê dewleta tirke hêrişê kurdan kenê. Nê hêzî têgêrayîşê azadîye yê cinîyan ê kurdan vera sîstemê xo yê serdestîya camêrdan sey gefêk vînenê. Seke Rayber Apoyî vat qet yew serebût herêmî nîyo pêro serebûtî global ê.

Na raştîye ser o ma reyna anê ziwan ke Qirkerdişê Parisî têna hetê cerganê dewlete û MÎTî ra nêame kerdene. No hêriş qirkerdişo mîyanneteweyî û polîtîk o û vera kurdanê azadan ame kerdene.

Embaze Sara endama ronayoxe ya Têgêrayîşê Azadîye yê Kurdîstanî bîye. Aya ke qirkerdişê dişmenî red kerdî milîtanêka cinîye ya radîkale bîye. Embaze Sara cinîyêka serkêşe bîye ke pêro emrê ci pê têkoşîn û xoverdayîşan derbaz bi. Qirkerdişo ke vera embaze Sara ame kerdene heman wextî de vera têgêrayîşê azadîye yê cinîyan bi.

Têkilîya embaze Sara ya bi Rayberîye azadîye ser o bîye. No qirkerdiş şexsê embaze Sara de vera têkilîyanê Rayberîye-cinîyan ame kerdene. Coka Rayber Apoyî bi vatişê 'Ha ez kişîyayo ha Sara kişîyaya' armancê nê qirkerdişî eşkera kerd. Embaze Sara cinîyan ê xoverdayoxan ê Dêrsimî ra yew bîye. Rayber Apoyî wexto ke embaze Sara ameye qetilkerdene wina vatbi: 'No Terteleyê 1938î yo diyîn o.'

Embaze Sara wayîra ê rol û mîsyonî bîye ke a pê raştîya serdestîya camêrdan dîye, nakokîya cînsan nê esasî ser o ercnaye û eşkera kerd ke çareserîye rijnayîşê serdestîya camêrdan o. Na cinîya raybere hem seba Kurdîstan û Rojhelatê Mîyanênî hem zî seba pêro dinya girîng bîye. No qirkerdiş zî tewirê azadîye yê aye kerd hedef. Şexsê embaze Sara de vera serkêşîya Şorişê Cinîyan hêriş ame kerdene. Embazî Rojbîne û Ronahî zî bi heman armancî ameyî qetilkerdene.

Fransa mesuldara nê qirkerdişî ya

Qirkerdiş Paris de ame kerdene, hukmkerdişê kiştox Omer Guney ame dergkerdene, proseso huqûqî sey nimite ame caardene, tarîxê mehkeme vera ame taloqkerdene û peynî de zî mehkeme ra verî Guney xo kişt dosya ameye mîyankerdene. Nê pêro çîyî têkilîya Fransa û qirkerdişî mojnenê. Fransa rixmê îtîrafan zî dewleta tirke sûcdar nêkerde, vera hêrişanê dewleta tirke bêveng mende, seba ke dewleta tirke Şingal de serdeste biba venga Iraqî da, hêrişanê PDKyî de pê terorîzmî hêzê PKKyî sûcdar kerdî. Fransa neçare ya ke raştîyanê nê qirkerdişî eşkera bikera û polîtîkaya xo ya vera kurdan bivurna. Çimê cinîyan û şarê kurdî de Fransa mesuldara nê qirkerdişî ya.

No proses seba azadîya cinîyan û şaran girîng o. Nê esasî ser o ya ma wayîrê azadîya xo vejîyenê, têkoşîn kenê yan zî îmkanê azadîye do destê ma ra şoro. Ganî ma vera faşîzmî têkoşînê xo berz bikerê, serrgêra Qirkerdişê Parisî 9ê Çeleyî bikerê sembolê têkoşînî û hesab bipersê. Ganî ma seba nê armancan bêrê pêser. Serra 2021î de ganî ma faşîzm, serdestîya camêrdan, tecawuz û qirkerdişan ra hesab bipersê û 9ê Çeleyî zî ganî bibo tarîxê berzbîyayîşê têkoşînê ma. Ma venga pêro cinîyan ê kurdan û cinîyanê dinya kenê ke tewrê nê têkoşînî bibê. Ma pîya faşîzm, kulturê tecawuzî, polîtîkayanê faşîzmî, dezgehanê cergan û dewlete birijnê.

Embaze Sara kitabê xo de wina vana: ''Eke cuye pêrodayîş o o çax pêrodayîş ho dewam keno. Serekî wexto ke kitabanê min ê pêrodayîşî ra behs kerdêne vat 'Hînî ti do Romanê Serkewtişî binusa.' Beno ke seba romanê serkewtişî firsendê mi nêbeno la ez qerardar a ke pêrodayîşanê xo de tamê serkewtişî bivîna.''

Nê îfadeyanê destanwarîyan ser o ma vera sîstemê camêrd-dewlete bi destê cinî û şaran serkewtişê azadîyeaver berê. Ma sey têkilîya raştikêne ya Rayber Apoyî û embaze Sara azadîya Rayber Apoyî bigêrê merkezê têkoşînê azadîye yê cinîyan. Ma pê caardişê 'cuya azade, Kurdîstano azad, cinîya azade û dinyaya azade' minetê xo Sarayan rê pêşkêş bikerê. Nê esasî ser o ma şexsê Sara, Rojbîne, Ronahî, Sêvê, Pakîze û Fatma de pêro şehîdanê azadîye bi minet û rêzdarî yad kenê. Sebebê cuya ma yo ke ma seba ke layîqê înan bibê têkoşîn kenê.''