Koordînasyonê KJK'yî bi eşkerayîyêka nuştekîye da zanayene ke hêrişê îşxalkarîye yê dewleta Tirkî verba Rojawanî dewamê kompolya 9'ê Teşrîna Verêne yo û hêrişêko bêwijdan û bêexlaq o ke verba Kurdan, cinîyan û şaran  yeno kerdene.

 Eşkerayîye de nê çîyî ameyî parbekerdene: 

"Rayapêroyî ya dinya Kurdan, cinîyan û şaran reyde ya ke bi mêrxasî xo ver danê. Tirkîya wareyê mîyanneteweyî ra tecrîd bîya û nika ra dima zî mabênê dewletan de sey dewleta terorîste bêra pênaskerdene. Hukmatê Erdoganî yo faşîst wazeno DAÎŞ ganî biko û hem verba dewletanê Ewropa hem zî verba Îran, Îsraîl û dewletanê bînan herême bixebitne. Na rewşêka eşkera ya. DAÎŞ'o rastekên hukmatê Erdoganî bi xo yo. Xoverdayîşê şarê Kurdî xoverdayîşê hêvîye û hesretê merdimîye yo. Serê nê esasî de her çi ra ver ma xoverdayîşê QSD, YPG û YPJ'yî, xoverdayîşê cinîye û şaranê Vakur û rojakewtena Sûrîye bi coşî selam kenê. Serkewtiş do qetî ê hêzanê rûmetên ê xoverdayoxan bibe."

Eşkerayîye de ame vîrvistene ke çeteyanê Dewleta Tirkî şero gemarin de 12'ê Teşrîna Verêna 2019 de Sekretera Pêroyî ya Partîya Amayoxî ya Surîye Hevrîn Xelefe bi hewayêkê barbarî qetil kerde û ame vatene ke:  "Verê çimanê dinya de cinîyêka sîyasetmedare û raybere bi binpaykerdişê qanûnanê şerî înfaz kerde. Şexsa Hevrîn Xelefe de hêrişê verba cinîyanê ke wazenê bi hewayêkê azadî biciwîyê, verba îradeyê înan de ame kerdene. Çeteyanê DAÎŞ'î yê dişmenanê cinîyan reyna rîyê xo yê dişmenîye merdimîye rê û demokrasîya cinîyan rê mojna."

KJK'yî  da zanayene ke seba vîrameyîşê Hevrîn Xelefe do xoverdayîşê xo  û karê rê xo bi qerardarîyêka pîle dewam bikê û veng da şaranê herême  ke bibê yew. KJK'yî seba yewîya neteweyî ya Kurdan zî veng da ke bi nê hewayî eşkenê vîrameyîşê Hevrîn Xelefe rê bêro cewabdayene.