Koordînasyonê KJKyî eşkerayîyêka nuştekîye weşanaye û bale ante zêdebîyayîşê teda, kiştişî, tacîz û tecawuz û remnayîşê cinîyan ser.

Eşkerayîya KJKyî wina ya:

''Ame parekerdene ke menga çeleyî de tewr tay 37 cinîyî ameyî kiştene. Tirkîya de hema hema her roje cinîyî yenê kiştene.Tirkîya de ke welatê camêrdan ê kiştoxan o, welatêk a ke qirkerdişê cinîyan resa asta barbarîye.

Dêrsim de Gulîstane Doku mengêke ra zêdêr vîndîbîyaye ya û nêameye dîyene.

Dêrsim de û pêro Kurdîstan de îstîsmarê domanan hetê dewlete ra bi hawayêkê sîstematîkî yeno kerdene. Êyê ke domanan îstîsmar kenê, vera dîyayenê. Dewleta tirke xîret kena ke domanan tecawuzkeran reyde bizewijna. Şirnex de zî serebûtê cinîyêke û mêrdeyê ci yê ke sûryanî yê nêame eşkerakerdene. Reyna veradayîşê humkdarê Qirkerdişê Sêwazî nê pêro mojnenê ke dewleta tirke dişmenê cinîyan, xozayî û nîjadperest a.

Bi qanûnê nobetdaran (bekçî) tewr zaf cinîyan rê gef yeno wendene. Bi nê qanûnî destûr yeno dayene ke mudaxeleyê cuya cinîye bêro kerdene. Wazenê ke cinîyan keye de hepis bikerê, bikerê obje. Ganî merdimî ver anê qanûnî wurzê payan ser.

Gulîstane Doku çira nêna dîyene? Çunke nêgêrenê ci. Çunke mesele resaye dewlete. Kurdîstan de polîtîkayê taybetî yê MÎTî yê vera cinî û ciwananê Kurdîstanî yenê caardene.  Çîyê ke ameyî Gulîstane sereyî ganî bêrê eşkerakerdene. Seba naye pêro dezgehê Dêrsimî xebitîyenê û ganî nê dezgehî dewaya Gulîstane ra fek vera nêdê.

Nê esasî ser o ma venga pêro cinîyan û şarê xo danê ke her ca de rêxistina xo bîkerê û xo bipawê. Her dewe, taxe û şaristan de eke keye bi keye rêxistinbîyayîş nêro kerdene faşîzmê AKPyî do hukmê komelî bikero.

Ma venga şarê xo, cinîyan, hêzanê demokrasîyî û azadîye danê ke dewlete ra çîyêk hêvî mekerê, rêxistina xo bikerê û xo bipawê. Pêro pîya xo perwerde bikerê, zanayîş bidê yewbînan, wayîrê yewbînan bivejîyê.

Aqibetê Gulîstane Doku teqez bêro eşkerakerdene.

Ganî komel dersa ganîyî bido îstîsmarkeranê domanan. 

Pêro cinîyî ganî teqez vera qanûnê zewijnayîşê domanan ê bi îstîsmarkeran vinderê. Seba ke no qanûn meclîs de nêro qebulkerdene çalakîyan bikerê. Cinîyê Tirkîya û Kurdîstanî vera zîhnîyetê serdestîye yê camêrdan ê faşîstî, vera polîtîkayanê dewlete têkoşînêkê hemparî bikerê.''