KJKyî bi wesîleya serrgêra 10. ya Qirkerdişê Parisî yê 9ê Çeleyê 2013yî eşkerayîyêke daye. Eşkerayîye wina ya:

''Ma kewtê serra desine ya şehadetê embazanê ma Sara, Rojbîne û Ronahî yê ke 9ê Çeleyê 2013yî de hetê dewleta tirke ya faşîste ra ameybî qetilkerdene. Bi na wesîle ma sere de şexsê hemraya ma Sara, Rojbîne û Ronahî de Rosa Luksemburga ke 15ê çeleyê 1919î de hetê faşîstan ra kişîyabî, Sêvê Demîr, Pakîze Nayir, Fatma Ûyar ê ke 4ê çeleyê 2016î de Silopî de ameybî qetilkerdene, Endama Konseya Rayberdişî ya KCKyî Evîne Goyî, Mîr Perwer û abdurrahman Kizil ê ke 23yê kanûne de Paris de ameybî qetilkerdene bi rêzdarî yad kenê. Ma bi rêzdarî verê înan de sereyê xo anê war û sozê xo dibare kenê ke do armancanê înan bîyarê ca, qesasê înan bigêrê.

Sara û Evînê ke seba azadîye bi heskerdişî şîyî, bi kede û heskerdişêkê pîlî şorişê cinîyan munit, mîrasêko pîl xo pey de verda. Nê cinîyê serkêşî ferman danê ma ke ma şorişê cinîyan ser bivisnê. Nê dewrî de xîret yeno kerdene ke cewherê cinîyan bêro qetilkerdene û na hişmendîya qirkere bêra vilakerdene. Embazê ma yê qehremanî rayîrî mojnenê ma û îmkan danê ke ma bi coşî nê rayîrî de şorê. Ma do qetî hesabê nê qirkerdişan bipersê, mesuldaran eşkera bikerê, verê tarîx û merdimatîye de muhakeme bikerê.

Her şehadetê cinîyan de cehdê ma yê têkoşînî geş beno, nasnameyê ma yê cinîtîye xurtêr beno û qerardarîya ma ya rêxistinbîyayîş û têkoşînî zêdîyena. Rayîro tewr bingeyî yê qirerdişî komel de şiknayîşê cinîyan ê serkêşan o û bi derbazkerdişê qalibanê tradîsyonî yo. Seba ney zî hêzê îşxalkerî û kolonyalîstî bi taybetî cinîyê serkêşî hedef benê û verê înan gêrîyeno. Na mana de faşîzm û kolonyalîzm bi hedefkerdişê cinîyan ê kurdan xîret kenê ke qirkerdişê kurdan bi lezêr bikerê. Bi qetilkerdişê embazanê ma Sara, Rojbîne, Ronahî, Sêvê, Fatma, Pakîze, Hevrîn Xelef, Jiyan Tolhildan, Nagîhan Akarsel û Evîn Goyî raştîya cinîyan ê azadan û kurdanê azadan yena hedefkerdene.

Têgêrayîşê Azadîya Cinîyanê Kurdîstanî bi beşdarî, qehremanî û kesayetê fedayî yê embaze Sara bingeyê xo naro û nê bingeyî ser o xurtêr bi. Embaze Sara afernayoxa xeylêk gaman bîye û bi fedayîtî serkêşîye kerde. Coka Rayber Apoyî vatbi 'Têkoşînê Sara têkoşînê têgêrayîşê azadîya cinîyan o.' Rayraşîyayîşê embaze Sara bi sebebê serewedaritiş, hişyarbîyayîş, rêxistinbîyayîş û artêşbîyayîşê bi hezaran cinîyan ê azadîgîran. Embaze Evîne Goyî zî sere de hişmendîye rêxistinbîyayîş û fermandarîya cinîyan xurtêr kerde. Tarîxê xo yê têkoşînî yê 34 serran de aye erjê pîlî afernayî û nê erjî bi hawayêkê xurtî embazanê xo, şarê xo û cinîyan de vila kerdî. Coka hedefkerdişê embaze Evîne seba çinkerdişê şorişê cinîyan, raştîya kurdanê azadan û cinîyan bi. Reyna nê pêro hêrişî têgêrayîşê ma yê azadîye, Rayberê ma û armancanê ma yê azadîye hedef kenê.

Şarê ma, embazê ma yê ke seba cinîyan têkoşîn kenê, hol zanenê ke kiştoxî kam ê. Mesuldarê wird Qirkerdişanê Parisî zî rejîmê AKP-MHPyî yo faşîst û MÎT ê. Qirkerdişê Parisî yo Yewin des serran nêame roşnîkerdene, coka Qirkerdişê Parisî yo Diyîn zî ame kerdene. Kiştoxê nê hêrişan pir eşkera yê. Ganî dewleta Fransa reya diyîne nê qirkerdişî nênimna,  têkilîyanê xo yê sîyasîyan ê zereyî û teberî roşnî bikera. Ganî şarê ma û dostê ma qetî meverdê ke nê qirkerdişî bêrê nimitene yan zî vîrakerdene, wa şarê ma heta peynî nînan teqîb bikero û hesab biperso. Dewleta tirke çar hetanê dinya de şerê qirkerdişê kurdan kena; koy, şaristan, Kurdîstanî û her cayê Ewropa de sûcanê şerî kena. Ganî dewleta tirke ya faşîste sûcanê xo yê şerî ra mehkemeyanê mîyanneteweyîyan de bêra muhakemekerdene. Heta ke bêra muhakemekerdene ma do têkoşînê xo rê dewam bikerê.

Çalakîyê ke 23yê kanûne ra nata hetê şar, dostanê ma û embazanê ma yê cinîyan ê Ewropa ra yenê kerdene, çalakîyê xaf girîng û manadar ê. Rayraşîyayîşê 7ê Çeleyî yo heybetîn bi asta tewr berze ya nê çalakîyan. Sey KJKyî ma nê çalakîyan selam kenê. Ganî no rayraşîyayîş û têkoşînê ma bi nê wextî nêrê sînordarkerdene, heta netîce bêra girewtene û mesuldarê qirkerdişî bêrê muhakemekerdene ganî çalakîyê ma bi hawayêkê xurtî dewam bikerê.''