Koordînasyonê KJKyî derheqê Roja Cinîyan a Dinya ya 8ê Adare de eşkerayîyêke daye. Eşkerayîye wina ya:

‘’Ma 8ê Adare bi kelecan û hêvîyêka pîle û bi ruhê xoverdayîşî pêşwazî kenê. Şexsê Roza, Sara, Salîha, Nesrîn û Sevîm Belliyan de ma pêro şehîdanê xo bi rêz û minetî yad kenê. Ma Roja Cinîyan pêro cinîyan rê fîraz kenê.

Ma embazê cinîyan û pawitoxê azadîye Rayber Apoyî zî bi rêz û heskerdişêkê pîlî selam kena. 

Ma tewrê ‘Vengdayîşê Haştîye û Komelê Demokratîkî’ yê Rayber Apoyî benê û serkewtişê nê vengdayîşî sey erkê xo vînenê. Ma venga pêro cinîyan danê ke bi ruh û coşê 8ê Adare tewrê nê vengdayîşî bibê.

Cinîyê ke bi felsefeya ‘Jin, Jiyan, Azadî’ vengê xo berz kenê dinya vurnenê. Şorişê ma yê cinîyan şert û mercanê Şerê Dinya yê Hîrêyînî de ver bi azadîye şino. Şexsê Şorişê Cinîyan ê Rojawanî de bi modelê cinîya azade û komelê azadî hinî ameyo îsbatkerdene ke modernîteya cinîyan a demokratîke sey alternatîfêkî vejîyaya vernî û pêro dinya rê bîya çimeyê îlham û hêvîye. 

PKKyo ke serkêşîya cinîyan de bi têkoşînê xo yê azadîye 50 serran o têkoşîn keno, sînorî derbaz kerdî û pêro dinya rê vila bîyo. PKKyo ke vengdayîşê Rayber Apoyî ser o erkê xo yo tarîxî ardo ca bingeyê neweraawanbîyayîş û awankerdişê komelê demokratîkî de rayraşîyayîşê xo yê ver bi azadîye dewam keno.

Seba serkewtişê ‘Vengdayîşê Haştîye û Komelê Demokratîkî’ her çî ra ver caardişê azadîya Rayber Apoyî û caardişê şertanê xebata azade lazim ê. Adirbirnayîşo ke vengdayîşî ra dima partîya ma PKKyî îlan kerdo zemînêkê haştîye yo girîng awan kerd. Ganî nê zemînî ser o pêro beşê Kurdîstan û Tirkîya tewrê vengdayîşê tarîxîyî bibê.

Vengdayîşê Rayber Apoyî vera Şerê Dinya yê Hîrêyînî yê kapîtalîzmî, vera serdestîya camêrdan, vera tradîsyonê tecawuzî, vera qetilkerdişê cinîyan û vera tradisyonê şîdetî do bibo serkewtişê tradîsyonê azadîya cinîyan. Cinîyî bi xo temînatê serkewtişê demokrasîyî yê. 

Ma do bi hişmendî û mesuldarîya xo ya tarîxîye her ca de bi seferberîya rêxistinbîyayîş, perwerde û çalakîyan tewrê vengdayîşê Rayber Apoyî benê. Seba ke no proses ser bikewo girîng o ke têgêrayîşê cinîyan ê Vakurê Kurdîstanî û Tirkîya zî tewrê vengdayîşî bibê. 

Mudaxeleyê vera Sûrîye û rijîyayîşê rejîmê Baasî reyde Rojhelatê Mîyanênî de prosesêko newe aver şi. Modelê komelê demokratîkî yê Şorişê Cinîyan ê Rojawanî

seba pêro cinîyan modelê cuye yo raşt o. Têkoşînê cinîyan ê Rojawanî do rayîrê Komara Sûrîye ya Demokratîke abikero. 

Îran û Rojhelatê Kurdîstanî de şîarê ‘Jin, Jiyan, Azadî’ serkêşîya cinîyan de vurîyayo felsefeya cinîyanê dinya. Têkoşîn û eşqê azadîya cinîyan ê Îran û Rojhelatê Kurdîstanî bi zîndan û cezaya dardekerdişî do nêrê teslîmgirewtene. Xoverdayîşê Zeynep Celaliyan, Pexşan Ezîzî, Werîşe Mûradî û Şerîfe Muhammedîyan do rayîrê Komara Îranî ya Demokratîke abikero.

Teda û astengîyê vera têkoşînê cinîyan ê Iraqî û polîtîkayê vera destkewteyanê cinîyan benê xorinêr. 

Têgêrayîşê cinîyan ê kurdan ê Ewropa û teberê Kurdîstanî bi hesreta welatî û xeyalê welatê azadî têkoşînî rê dewam kenê, mabênê globalbîyayîşê azadîya cinîyan û çareserkerdişê meseleya kurdan de bîyê pirdêko pîl. 

Cinîyî seba azadîya xo her hela cuye de bedelan danê. Armancê Haştîye û Komelê Demokratîkî îdealê cuya azade û rinde, pîlkerdişê xeyalê pêro cinîyan, dadîyan û ciwanan o. Ma venga pêro cinî û têgêrayîşanê cinîyan danê ke paştî bidê nê prosesî. Yewîya têkoşînê cinîyan do şer û tradîsyonê şîdetî yê serdestîya camêrdan birijnê û seserra 21ine bikero seserra azadîya cinîyan.

Hewcedarîya Haştîye û Komelê Demokratîkî seba cinîyan zaf girîng a. Hemleya ma ‘Ma bi Jin, Jiyan, Azadî ver bi Şorişê Cinîyan Şinê’ ya ke girêdayeyê awankerdişê komelê demokratîkî û pawitişê erjanê şorişê cinîyan o, dewam kena. Sey cinîyan ma eşkenê bi ganîkerdişê Komelê Demokratîkî û serewedaritişê vera serdestîya camêrdan sîstemê konfederalîzmî yê cinîyan awan bikerê. Xopawitişê ma bi Haştîye û Komelê Demokratîkî mumkîn o.

Bi wesîleya 8ê Adare ma venga pêro cinîyan danê ke bi şîarê ‘Bi Awankerdişê Komelê Demokratîkî, Bêrê Ma Pîya Pêro Rojan Bikerê Roja Cinîyan’ verê xo bidê waran û vera serdestîya camêrdan têkoşîn, hişmendî û rêxistinîya xo pîlêr bikerê.

Erdê Mezopotamya de wisar mijdanîya gandarbîyayîşê cinîyan dano. Bi na wesîle ma 8ê Adare pêro cinîyan rê fîraz kenê.’’