Aktîvîste Feryale Silêman Xalid 18ê çeleyî de netîceya suîkastêkî de Kerkûk de amebî qetilkerdene. 

Koordînasyonê KJKyî bi eşkerayîyêke qetilkerdişê sîyasetmedare Firyal Silêman Xalid şermezar kerd. Eşkerayîye wina ya:

''Dewleta tirke ya faşîste, kiştoxa cinîyan û qirkere ancî rîyê xo yo tarî û gemarin bi qetilkerdişê Firyale Silêman Xalid mojna. Ma embaza xo ya şehîde bi minet û rêzî yad kenê, soz danê ke wayîrê têkoşînê aye yê 30 serran vejîyê. Ma do dewleta tirke ya faşîste, hemkaranê ci û tetîkkêşanê ci ra hesab bipersê û nê qetilkerdişî bi nefretî şermezar kenê.

Îqtîdarê AKP-MHPyî yo faşîst 2013 ra nata bi hawayêkê sîstematîkî cinîyan ê şorişgêr û sîyasetmedaran ê kurdan keno hedef. Qirkerdişê Parisî yê 9ê Çeleyê 2013î ra nata Ewropa, Vakur, Başûr û Rojawanê Kurdîstanî de dewleta tirke bi desan cinîyê şorişgêr, sîyasetmedar û aktîvîstî qetil kerdî. Bêguman seba ke cinîyê kurdî 50 serranê têkoşînî de bi feraset û hayîdarîya xo bîyê serkêşê têkoşînê azadîye nê cînayetî yenê kerdene. Dewleta tirke kena ke na asta cinîyan ê kurdan apey bera û vana qey bi qetilkerdiş û tersnayîşî eşkera cinîyan têkoşîn û xoverdayîşî ra dûrî bikera. La pratîkê 50 serran mojna ke dewleta tirke xelet a. Her qirkerdiş û qetlîam qerardarî û îradeyê cinîyan xurt kerd. Bi qetilkerdişê Sakîne Cansiz bi hezaran Sakîneyan refanê têkoşînî de cagirewt.

Dewleta tirke seba ke têkoşînê cinîyan ê kurdan ra tersena û dişmena cinîyan ê kurdan a embaza ma Firyale qetil kerde. Ancî bi nê qetilkerdişî armanc kerd ke destkewteyanê kurdanê Kerkûkî xesp bikera, Kerkûkî kurdan ra xalî bikera, tede kaos û krîzan viraza û pêkewtişan bida destpêkerdene.Dewleta tirke ya faşîste Rojawanê Kurdîstanî de zî binawanîye dana bombayan ver, îstasyonanê awe, ceyran, gazî û depoyanê xida çin kena û kena ke demografîya Rojawanî bivurna. La ma ancî anê ziwan ke şima do ser nêkewê û bin bikewê. Ma do sey cinîyan têkoşînê azadîye bihêz bikerê, pîlêr bikerê û sey şarê kurdî erkê xo terk nêkerê. 

Şima do bi qetilkerdiş û tepiştişê cinîyan ê kurdan nêeşkenê verê qerardarîya ma ya serkewtişî bigêrê. Eqsê ci qerardarîya ma bena tûj, îradeyê ma beno xurt û têkoşînê ma  beno pîlêr.

Ma venga cinîyan ê kurdan û şarê ma danê ke refanê xoverdayîş û têkoşînî yê Firyalan de cabigêrê, dewleta tirke rê cewabê tewr xurtî wina bidê. Ma venga pêro cinîyan ê antîkapîtalîste, têkoşeran û azadîgîran danê ke verê nê cînayetanê dewleta tirke bigêrê. Ma venga komelê mîyanneteweyî, hêzanê herêmîyan û welatanê nê cînayetan danê ke vera dewleta tirke ya faşîste tewir bigêrê û erkanê xo bîyarê ca.''