Koordînasyonê Komalanê Cinîyanê Kurdîstanî (KJK) bi wesîleya serrgêra Qirkerdişê Şingalî eşkerayîyêka nuştekîye weşanaye û nê pare kerdî:

''3ê Tebaxa 2014î sey qirkerdişê cinîyan kewt tarîxî. 3ê tebaxe sere de komelê ma yê êzidîyan seba merdimîye û herême bîyo tarîxêk ke ganî nêro vîrakerdene. Bi hezaaran êzidîyî verê çimanê dinya de bawerî û nasnameyê xo ra ameyî qetilkerdene û înan rê qirkerdiş ame ferzkerdene. Bi hezaran cinîyê êzidîyî vera pêro kerdişanê barbaran û tarîyan ê faşîzmî bazaran de ameyî rotene, raştê tecawuzî ameyî û ameyî qetilkerdene. Hema zî aqîbetê bi hezaran cinîyan nêzanîyeno.

Serrgêra 8. ya fermanî de ma sey roja verêne dej, hêrs û qesasê ney ciwîyenê û ma do nê qirkerdişî xo vîr a mekerê. Kesê ke no qirkerdiş kerdo û mesuldarê ci yê ma înan bi nefretî şermezar kenê û ma dîyar kenê ke ma do têkoşînê xo de hesabê înan bipersê. Ma şehîdanê fermanî û pêro şehîdanê xoverdayîşê Şingalî bi hûrmet yad kenê. Ma sozê xo dibare kenê ke ma do vîrameyîşê înan Şingalê azad û xoserî de bidê ciwîyayene.

Nê fermanî de mesuldarîya PDK û hêzanê Iraqî est a. PDK û hêzê Iraqî herinda ke hesab bidê şarî wazenê reyna xo komelê êzidîyan rê ferz bikerê.Komelê ma yê êzidîyan dîyar keno ke ferman de mesuldarîya înan est a û Peymana 9ê Teşrîna Verêne zî sey dewamê fermanî vîneno.

Birînê fermanî çend giran bibê zî xopawitişê êzidîyan, xoîdarekerdişê, xorêxistinkerdişê êzidîyan nêverda ke ferman ser bikewo. La dewleta tirke ya faşîste ke sey DAÎŞî têgêrena, ewro çîyo ke DAÎŞ nêeşkabi bikero, wazena temam bikera. Îqtîdaro faşîst ê AKP-MHPyî îradeyê xoîdarekerdişî yê êzidîyan rê tehamul nêkeno û verê çimanê dinya de her roje Şingalî dano bombayan ver, doman û serkêşanê komelê êzidîyan qetil keno. Dinya nê hêrişanê dewleta tirke ya barbare têna seyr kena û tira vengê xo nêkena. 

Verê komelê ma yê êzidîyan û cinîyan de mesuldarî û erkê ma est ê. Sere de komel û dezgehê mîyanneteweyî, têgêrayîşê cinîyan, pêro hêzê demokratîk ganî vera hêrişanê dewleta tirke ganî xopawitiş, îrade, xoîdarekerdişê nê komelî qebul bikerê û paştî bidê înan. Tay welatanê Ewropa fermanê vera êzidîyan sey qirkerdişî qebul kerdo. Na game zaf girîng a la kêm a. Welatê Ewropa ganî vera hêrişanê dewleta tirke yê ke dewamê fermanî yê, tewirê xo zelal bikerê û paştî bidê îradeyê xoîdarekerdişî yê komelê êzidîyan.

Komelê ma yê êzidîyan, bi taybetî cinîyê êzidîyî senî ke bawerî, kultur û felsefeya Êzdaya ke kulturê ma yo kahan o, arda heta nika, nika ra pey zî do bidê ciwîyayene, seba ney xo ver bidê, xo rêxistin bikerê û xebatanê xo yê serê awankerdişê azadîye xorinêr bikerê. Pîlkerdiş û dewamkerdişê nê kulturê ma yê qedîmî sere de ê kurdan wezîfeyê pêro merdimîye yo.''