Hemserekîya Konseya Rayberdişî yê KCKyî bi wesîleya serrgêra 8. ya Qirkerdişê Şingalî eşkerayîye daye û nê pare kerdî:

''Ma serrgêra ci de reyna qirkerdişo ke Şingal de vera êzidîyan ame kerdene, şermezar kenê û kesanê ke qirkerdiş dinyaya xo bedilnaye, ma înan yad kenê. Têgêrayîşê Azadîye yê Kurdîstanî, şarê kurdî û şarê Şingalî do çirey nê qirkerdişî xo vîr ra mekero  û sey heta ewro do ewro ra tepîya zî qirkerdoxan ra hesab biperso.

No qirkerdişo ke hetê DAÎŞî ra vera êzidîyan ame kerdene qirkerdişanê tewr giran ê tarîxî ra yew o. No qirkerdiş sere de dewletê herême verê çimanê dinya de ame kerdene la qet çewî cehd nêkerd ke verê ci bîgêro. Êzidîyî qirkerdişî rê rî bi rî mendê. Qirkerdişê Şingalî sere de semedê herême bi nameyê merdimîye şermêko pîl o. Seba ke nê şermî ra bêro xalisyayene ganî paştî bidîyo têkoşînê estbîyayîş û azadîye yê şarê Şingalî. Seba ke şarê Şingalî reyna raştê qirkerdişî mero û bawerî û nasnameyê biciwîyo ganî paştî bidîyo ci.

Êzidîyî tarîxî ra nata tim raştê qirkerdişan yenê. Nê qirkerdişê ke êzidîyî sey fermanî name kenê, netîceya înan de tim şar erdê xo ra bîyo û dejê pîlî ameyî antene. Şarê ma yê êzidî seba ke bawerîya ci cîya ya, raştê nê hêrişan yeno. Êzidîyan çirey zirar nêdayo çewî. Têna wazenê bawerî û kulturê xo azad biciwîyê û estbîyayîşê xo bidomnê. No heqo tewr esas ê heme şaran o. Xora êzidîyan çiray dewlete nênaya ro û nê semedî ra tradîsyonanê ci de zext çîn o. Çi heyf ke dewletê serdestî û hêzê hemkarî tim vera êzidîyan qirkerdiş kenê. Seba ke êzidîyî tim semedê xo pawitişî koyanê Şingalî de ca danê xo nê koyî semedê înan bimbarek ê.

Seba ke PDK Şingal de yo, pawitişê şarî ra berpirsîyar o la PDKyî wextê qirkerdişî de şar têna verda û rema. PDK şar bêbawitişî verda û rema û  çeteyanê DAÎŞî bi hezaran êzidîyî qir kerdî, dest na cinîyan ser û ê bazaran de sey koleyan rotî. Sebebê na rewşa girane bêşik PDK yo. Herinda xorexnekerdişî de PDK û hemkarê ci bi nameyê Şingal û êzidîyan qisey kenê. Bê şik semedê şarê Şingal û şarê kurdî yew ercê nê bêhedîye çîn o. Nê şermê tarîxkîyî ne şarê Şingalî ne zî şarê kurdî do çirey xo vîr ra bikero.

PDKyo ke bê teqnayîşê guleyêkî şar caverda û rema mojna ke verî ra qirkerdişî ra hayîdar bi. No zaf zelal o. Eke wina nêbîyênî miheqeq tay pêşmergeyan şer kerdêne ya zî eke biremayêne zî cepxaneyê xo şarî rê verdayêne. La seba ke PDK hayîdarê qirkerdişî bi û plan  û qerarê remayîşî verî ra amebi girewtene wina yew şerm vejîya werte. Yeno zanayene ke verê qirkerdişî kombîyayîşî ameyî kerdene û ame plankerdene ke DAÎŞ Şingal û cayanê bînan do senî bifîno dest. PDK ke tewrê nê kombîyayîşan bi. Hêzê ke tewrê nê kombîyayîşan bîyî berpirsîyarê qirkerdişî yê.

Gerîlayanê Azadîye yê Kurdîstanî vera hêrişanê DAÎŞî mudaxale kerd û destûr nêda rewşe giranêr bo. Êzidîyî hela ke pêhesîyayê ke gerîlayî înan pawenê înan zî pîya bi gerîlayan têkoşîn kerd û qirkerdiş wina ame vindarnayene. Hêzê YPG û YPJyî paştî daye êzidîyan û têkoşînê vera qirkerdişî de rolo pîl kay kerd. Ciwananê êzidîyan bi rêxistinê pawitişî gama tarîxî eşt ê. Netîceya têkoşînê hêzanê Şingalî de çeteyî DAÎŞÎ Şingalî ra ameyî eştene û Şinga bi azad. Şehîdê sey Zerdeşt, Saît, Mam Zekî, Dijwar, Nazê, Gulçîne, Bêrîvane û xeylêk qehremananê bînan serkêşîya na gama tarîxî û azadkerdişê Şingalî kerd. Cinîyê êzidî zî sere ra têkoşîn de cayê xo girewt û cewabo xurt da hêrişkaran.

Ewro yeno waştene ke qirkerdişê vera êzidîyan o ke DAÎŞ nêeşka temam bikero, bêro temamkerdene.  PKK sey sebebê nê qirkerdişî yeno mojnayene. Na zûra pîl a. Her kes zaf hol zano ke badê azadkerdişê Şingalî Gerîlayê Azadîye hêzê xo Şingalî ra antî. Şingal de artêşa Iraqî û hêzê YBŞ û YJŞyî est ê. PDK zanaye vatişê PKK Şingal de yo vila keno. PDK sey hemkarê dewleta tirke babeta îşxalê Başûrê Kurdîstanî de PKKyî sey sebebê mojneno. Wina wazeno ke îşxalê dewleta tirke bikero meşrû la şarê kurdî zaf hol zano ke PDK senî pîya bi dewleta tirke têgêreno.

Dewleta tirke dişmenê kurdan û êzidîyan a. Coka hêrişê Şingalî kena û PDK zî paştî dano ci.  Xora dewlet tirke DAÎŞ verda Şingal, Kobanê û cayanê bînan. PDK wazeno ke pê hêrişanê dewleta tirke newe ra Şingalî ser o hukm bikero. PDK şarê Şingalî zî kampan de sey esîran tepişeno û keno ke na rewşa ra îstîfade bikero. Hetê bîna ra zî vano PKK destûr nêdano şar kampan ra agêro. Êzidîyî zaf hol zanê ke PKK senî nêzdîyê înan beno û xayînîya PDKyî zî rewna ra dîya.

Seba ke êzidîyî bawerî û kulturê xo azad biciwîyê sere de Neteweyê Yewbîyayeyî ganî her kes berpirsîyarîya xo bîyaro ca. Ma sey Têgêrayîşê Azadîye yê Kurdîstanî  sey vizêr ewro zî do paştî bidê êzidîyan. Şingal û şarê êzidî ma rê emanetê Rayber Apoyî yê. Seba ke Êzidxan estbîyayîşê xo bidomno û azad biciwîyo ma xo deyndar vînenê. Ma reyna veng danê ke wa heme êzidîyî agêrê erdê xo û waştişê xo yê Êzidxanê azadî bîyarê ca.''