Koordînayonê KJKyî ke derheqê îxtîmalê şerê birakujî yo ke beno ke Herêmanê Pawitişî yê Medya de biqewimîyo de eşkerayî daye û nê vatî:

''Ma sey şarê kurdî semedê newe ra afernayîşî, dewrêko muhîm de yê. Dewleta tirke ya dişmenê kurdan şerê çînkerdişê vera kurdan panc serranê peyenan de pîlêr kerdo. Vera naye heme Kurdîstan de têkoşînêko xurt  û şerê estbîyayîşî esto. Şarê ma çar leteyan de zî destkewteyê muhîmî fînayî dest.

Vakur de serkêşîya Rayber Apoyî  de şarî nasnameyê neteweyî yê kurdî newe ra aferna. Başûr de şarê ma serkêşîya pêşmergeyan de vera rejîmê Saddamî bedelê pîlî dayî û hukmatê Kurdîstanî na ro. Rojawan de şarê ma bi tekoşînê efsanekî yê vera DAÎŞî xoserîya xo aver beno. Rojhilat de vera rejîmê Îranî têkoşîno pîl yeno dayene.

Êzidî, elewî, yarasan û dînê el heqî ke Kurdîstanî de sey ê bînan yene dîyîne ke bêrê çînkerdene, xo newe ra benê ganî. Cinîya kurde ke yeno waştene ke reng û ziwanê ci bêro çînkerdene nika têkoşînan rê serkêşîye kena. Bi qala kilme eke ma raşt nêzdî bibê, rixmê heme zordarîyan û bedelanê ke ma dayî, kurdî dewrê xo yê zerdî ciwîyenê.

Îmkanê ma estê ke bibê wayîrê statuyî. Ma sey şarê kurdî eşkenê pîl qezenc bikerê. Tam wexto wînayên de PDK vera têgêrayîşê me amadekarîya operasyonî keno. No cehdkerdiş zaf bitehluke yo. Xora şarê ma binê hêrişê dewletanê serdestan de tengayî anceno. Eke wina şerêk bibo şarê ma hem madî hem manevî vînî keno. PDK bi destpêkerdişê şerêkê winayên ziraro tewr pîl zî do bibo xo. Bano ke fîkrê partîyanê kurdan cîya yê le no açarnayîşê şerî çîyêko zaf  cîya yo. Kurdan Başûr û Rojawan de vera DAÎŞî têkoşîno pîl da, bi hezaran şehîdî dayî ke dinya ci rê hurmet keno.

Tirkîya wazena ke verê vîjnayîşê Amerî ka bi şerê birakujî yewna darbe bido kurdan ro. Coka zor dana PDKyî ke wa şiro gerîlayan ser.  Şerê birakujî kurdan rê dano vînîkerdene. PDK ganî nînan vîno û xetayê tarîxî ra peyser agêro. PDK eke bi hemkarîya Tirkîya vera gerîlayan şer bikero no semedê şarê ma beno felaket. Ganî heme partîyê kurdan nê demê kritîkî de bêveng memanê û semedê vergirewtişê şerî têbigerê.

Ma veng danê PDKyî û vanê ke key şerê birakujî bîyo, ruhê şarê ma de dejê pîlî ciwîyayî ke weş nêbenê. Çîyo wînayên komel de nîno vîrakerdene. Şarê Başûrî nê dejî hol zano. Vera rejîmê Baasî û dewleta tirke de şehîdbîyayîş çîyêko bianor o la bi guleyê waybirayî merdiş çîyêko zaf cîya yo. Wa her kes bizano ke eke PDK hêrişê waranê gerîlayan bikero, şerwanê azadîye do cewabê înan bidê.

Kam ke şerî vejo do hêzo sûcdaro tewr pîl ê tarîxî bo. Ganî partîyê kurdan bi dîyalog û pêvînayîşan mesele çareser bikerê. Şero winayên tewr zaf hukmatê Başûrî  û PDKyî rê dano vînkerdene. Coka Tirkîya rê mexapîyê û amadekarîya nê şarî caverdê.  Ma veng danê şarê xo ke seba ke wa şer mevejîyo wa xîret bikerê. semedê vindarnayîşê nê şerî wa heme leteyanê Kurdîstanî de çalakîyî bêrê kerdene. Dey cinî, ciwan û roşnvîranê kurdan verê nê şerî bigerê.''