Komîteya Têkilî û Îtîfaqan a Demokratîke ya KJKyî eşkerayîyêke weşanaye û venga cinîyan da ke vera kişîyayîşanê sîyasîyan ê vera cinîyan yew bibê.

Eşkerayîye wina ya: 

''Cinîyî pê rayîrê têkoşînê xo, polîtîkayanê qirkerdişî roje bi roje zêdêr defîşre kenê û vera nînan şer kenê. Şîdetê camêrdan ê vera cinîyan serranê peyênan de zaf zêdîya. Polîtîkaya qirkerdişê cinîyan hetê dezgehanê sîstemê kapîtalîstî ra yena teşwîqkerdene û caardene. Serranê peyênan de kişîyayîşê sîyasî yê dewletan û şîrkeran ê vera cinîyanê rayberan zî zêdîyayî.

Nê cinîyê ke yenê qetilkerdene cinîyê aktîf û rayber ê. Cinîyê aktîvîst, avûkat, rojnameger, hunermend, şorişgêr û sîyasetmedarê ke heqanê merdiman, cinîyan û warê xo yê cuye pawenê, benê hedefê nê hêrişan.

Nê kişîyayîşî hetê rayaumûmî û medya ra nêdîyenê û hetê huqûqî ra bêceza vera dîyenê. Fermanê nê cînayetan hetê hêzanê dewletan ra dayenê. Dewletê neteweyî yê camêrdî merdimanê ke vera nê polîtîkayan vejîyayenê sey 'terorîst' îlan kenê û hêzanê winasênan zî bi heman sûcdarîye tasfîye kenê. Dewletê Tirkîya, Afganîstan, Kolombîya, Meksîka û Fîlîpînî mîsalê na rewş ê. Cinîyê têkoşerî hedefê nê dewletan de yê.

Tirkîya 9ê çeleyê 2013î de Sakîne Cansiz, Fîdane Dogan û Leyla Şaylemez; 43e çeleyê 2016î de Sêvê Demîr, Pakîze Nayir û Fatma Ûyar; 12ê teşrîna verêne ya 2019î de Hevrîne Xelef, 23ê hezîrana 2020î Zehra Berkel, Hebûne Xelîl û Amîna Weysî qetil kerdî ke nê pêro cinîyê rayberî yê têkoşînê azadîye bîyî. Afganîstan, Pakîstan, Meksîka, Afrîkaya Başûre, Fîlîpînan de zî bi nê hawayî cinîyê rayber û serkêşî hetê dewlete ra  ameyî qetilkerdene. Nê dewletê ke rêxistin û serewedaritişê cinîyan ra tersenê hêrişê înan kenê, tira gef wanenê, erzenê zînanan û ternenê. 

Ma zanenê ke sayê têkoşînêkê manadarî cinîyan zincîrê pederşahîye şiknayî û bîyî rayber. Sîstemo kapîtalîst bi rayîrê pederşahîye cinîyan keno kolonyal. No sîstem terseno ke warê xo yê îqtîdarî vînî bikero.

Cinîyî hêzo sereke yê têkoşînê vera nê sîstemî yê. Cinîyî pêro waran de têkoşînanê vera sîstemî de hêzê rayber ê. Têkoşînê cinîyan do morê xo bido seserra 21. Sîstemo serdest zî wazeno naye asteng bikero.

Têkoşînê cinîyan roje bi roje geş beno û polîtîkayê qirkerdişê cinîyan hetê sîstemî ra xorin beno. Polîtîkaya qirkerdişî ya dewlet, mafya û şîrketan hêz dano şîdetê camêrdan. Coka ganî pêro cinîyê dinya verê nê hêriş û qirkerdişan bigêrê. Ma sey Têgêrayîşê Azadîye yê Cinîyanê Kurdîstanî cînayetanê vera cinîyan şermezar kenê. Ma venga kerdoxan danê ke wa nê polîtîkayan vindarnê. Ma venga cinîyanê dinya danê ke karêk û têkoşînêkê hemparî bikerê. Ma hêzê xo bikerê yew, sîstemê serdestîya camêrdan û kapîtalîstî ra, selahîyetdaranê dewletan û patronanê kiştoxan ra hesab bipersê.''