Wekîla DEM Partî ya Qersî Gulîstane Kiliç Koçyîgît derheqê rejîmê qeyûman û tesîranê ci yê vera cinîyan de ANFyî rê qisey kerd.

Koçyîgîte ard ziwan ke qeyûman dima ke dest na şaredarîyan ser hêverî raştê hêrişê dezgehanê cinîyan, ciwanan û ziwanî kerdo. Koçyîgîte vat: ''Qeyûman kerd ke xebatanê cinîyan, ciwanan û ziwanî asteng bikerê. Qeyûman dezgehê cinîyan zî cade qefilnayî. Mîsal qeyûmê Amedî Merkezê Cinîyan ê Meya yê Şaredarîya Farqînî kerd 'Merkezê Paştdayîşê Keyeyan.' Mezgê qeyûman waşt ke cinîyan waranê sîyasî, ekonomîk, kulturel û komelkîyan ra dûrî bigêrê. Qeyûman seba ke destkewteyanê cinîyan çin bikerê nê hêrişî kerdî. La ê nêeşkayî têkoşînê cinîyan biqedînê.''

Koçyîgîte pare kerd ke rîyê qeyûman ra cinîyî verê hêrişan de bêpawitiş mendî û vat: ''Seba ke dezgehê ma yê cinîyan hetê qeyûman ra ameyî qefilnayene cinîyî verê şîdetê camêrdan de bêpawitiş û teyna mendî. Destkewteyê ma holîya îqtîdarî yan zî yê camêrdan ney berhemê têkoşînê ma yê. Ma do qetî têkoşînê xo ra fek vera nêdê û her ca de vajê 'Jin, Jiyan, Azadî.

Têkoşînê ma yê azadîye hem bi nasnameyê ma yê kurdayetîye hem zî bi nasnameyê ma yê cinîtîye dewam keno. Hêriş, teda û şîdetî çend ke bizêdîyê hende têkoşînê ma zî xurtêr beno. Dewlete zî naye hol zanena û kena ke verê têkoşînê ma bigêra. Seba ke hemşaredarê ma yê cinîyî ancî abigêrê erkê xo ser ganî mekanîzmayê huqûqî yê bitesîrî bêrê awankerdene û ma xebatanê xo yê weçînayîşanê herêmîyan xurtêr bikerê.''