13 bajaranê Ewropa de bi hewayêkê hemwextî mîtîngê paştdayîşê serewedaritişê şaranê Îranî mîtîngî ameyî kerdene. Bajarê Hamburgî yê Almanya de zî hetê Kolektîfê Jin Jiyan Azadî ra bi eynî waştişî mîtîngêk ame kerdene.

Cinîyê kurdîstanijî zî pê beyraqe û flamanyanê xo tewrê mîtîngî bîyî. Bado ke semedê xoverdayoxanê ke ameyî îdamkerdene rêz ame girewtene Parlamentera Partîya Çepe  Cansu Ozdemîr qisey kerd.

Cansu Ozdemîr vist vîrî ke slogana “Jin jiyan azadî”  semedê heme cinîyan ê bindestan ê dinya bîya çimeyê îlhamî û vat: ''Hukmatê SPD û Hewzano ke Tirkîya rê hetkarîya çekan û ekonomî keno, o zî wayîrê na slogane vejîyeno ke na diritîye ya.'' Ozdemîre waşt ke wa heme tepişteyê sîyasîyî yê Îranî cade bêrê veradayene.

 Aktîvîsta Heqanê Cinîyan û Nuştoxe Anja Flach zî vat: ''Senî ke têkoşînê cinîyan ê Kurdîstanî semedê cinîyan ê dinya bîyo îlham, ewro zî jin jiyan azadî semedê cinîyan bîyo manîfestoyê azadîye. Seba ke cinîyî xo ver danê û wazenê ameyoxê xo bi destanê xo bimanê, yenê qetilkerdene la hinda çew nêeşkeno verê têkoşînê ma bîgêro.''