Fermandarîya Pêroyî ya Hêzanê Sûrîyeya Demokratîke (QSD) derheqê serebûtanê Sûrîye de kombîyayîşê çapemenîye kerd. Fermandarê Pêroyî yê QSDyî Mazlûm Ebdî û fermandaranê YPJyî ra Rohilate Efrin cewab da persanê rojnamegeran.

Mazlûm Ebdîyî nê cewabî dayî persan:

"Taxanê kurdan ê Helebî de 250 hezarî ra zafêr kesî est ê. Binê ablûqa de yê. Ûca de hêzê ma zî est ê û bi hewayêkê qehremankî şarê ma pawenê. Ma wazenê wa taxanê kurdan de problem bi rayîrê dîyalogî bêro çareserkerdene. Şarê ma wazeno ûca bi nasnameyê xo bibo parçeyêkê Helebê newe yî. Semedê nê cehdkerdişê ma dewam kenê. Tehdîtê Tirkîya dewam kenê. Minbic û bajaranê bînan dehdît kenê. La ma verî zî vatbi: Ma wazenê problamanê xo bi Tirkîya bi rayîrê dîyalogî çareser bikerê. Hêzê Koalîsyonî zî cehd keno ke tansîyonî bîyaro war. Sere de Minbic bajaranê Rojawanî de vera heme hêrişan hazirîya ma est a. Hêzê QSDyî est o ke heme şarê ma bipawo.

Badê hêrişê peyênî de Sûrîye de venganeyo gird pêame.Rejîmê Sûrîye tay cayan ra xo peyser ant. Nê venganeyan DAÎŞ keno de.  Xeylê cayan de DAÎŞî dest pê hêrişan kerd. Ma Dêrazor, Raqa û Tebqa de semedê pawitişê şarê xo heme tedbîran genê. Ma veng danê şarê xo ke wa dormeyê QSDyî bêro têhet û têkoşîn bikero. Ma vera tehdîtanê DAÎŞî Hêzanê Koalîsyonê Mîyanneteweyîyî reyde îrtîbat de yê. Ganî no îrtîbat bêro xurtkerdene.

Sûrîye de proseso sîyasî û leşkerî yo newe vejîya werte. Averşîyayîşanê peyênan zî mojna ke çareserîya sîyasîye hewce kena. Ma zî hetê çareserîya sîyasîye de yê. Prosesanê verênan de seba ke îdarekarê Rojawanî tewrê tewrê pêvînayîşan nêbîyî, nê pêvînayîşî ser nêekwtî. Ma semedê çareserîya sîyasîye hazir ê. Ganî îdarekarê Rojawanî mîyanê pêvînayîşan de ca bigîrê ke problem bêro çareserkerdene.

Derheqê Helebî de îrtîbatê ma bi HTŞyî est o. Heta nika ma înan reyde şer nêkerd. Prosesêko newe vejîya werte. HTŞ Sûrîye de xeylê cayan ra vila bi. Çîyo ke ma eleqedar keno; herêmê ma wa raştê hêrişan merê. Eke hêriş bibo ma pawenê. Hetê kamî ra beno wa bibo eke hêriş bibo ma do cewab bidê. Ganî tansîyon bêro war. Wa heme hêzê adirbirnayîş bikerî. Ganî ma bi rayîrê sîyasîyî problemanê xo çareser bikerê. Seba ke ma herêmanê xo bipawê ma heme hêzan reyde îrtîbat de yê. Îrtîbatê ma bi Iraq û dewletanê bînan est o. Serê na herême ra rîskê hêrişî est o. Tehdîtê Tirkîya est ê. Reqa û Dêrazor de tehdîtî est ê. La semedê pawiitşê şarê xo ma heme tedbîrê ke hewce kenê ma girewtî.Sere de Amerîka Hêzanê Koalîsyonî û Rûsya reyde îrtîbatê ma est o.

Tehdîtê grûbanê Tirkîya dewam kenê. Vera hêrişanê nê grûban ma tedbîrê xo yê leşkerî girewtî. La nêwazenê herême de reyna pêkewtişî dest pêbikerî. Ma vera hêrişan her wextî ra zafêr hazir ê. Kam beno wa bibo eke hêriş bibo ma do înan peyser biqeldê. Seba ke şarê ma yê Şehba û Til Firatî ke binê tehdît de bê ma ûca ra vejê îrtîbatê ma bi Amerîka bibê. Amerîka zî dewletanê bînan ke îrtîbatê ci pê est o pêvînayîş kerdêne. La hema xeylê kesî ûca de yê. Ûca grûbî  û kesî ameyî astengkerdene. Merdimî ameyî kiştene û remnayene. Eke problemêk mevejîyo ma do ewro perûne ûca ra vejê.

Her wextî ra zafêr firsatê çareserîya sîyasîye est o. Ganî temsîlkarê na herême nê prosesî de ca bigîrê. Îrtîbatê ma bi Neteweyanê Yewbîyayeyan est o.Temsîlkarê Neteweyanê Yewbîyayeyan zî wazenê ma temsîlkarê herême mîyanê çareserîye de ca bigîrê. HTŞyî reyde qerarê ma yê şerî çîn o. Ê zî ma dir şer nêkenê.  Ma zî do biewnê îcraatê înan ra. Ma biewnê sozê xo tepişenê ya nê. Seba ke Sûrîye parçe nêbo, semedê çareserîya sîyasîye çi hewce keno ma do bikerê. Îrtîbatê ma sere de Iraq û Urdun heme dewletanê cîranan reyde est o.

Vera Kampa Holî rîsk est o. Têgêrayîşêk est o. DAÎŞî qewimîyayîşanê peyênan ra paştî cesaret girewt. Nê prosesî de ganî ma vera DAÎŞî Hêzanê Koalîsyonî reyde zafêr îrtîbat de bê. Sûrîye de rewşe bedilyaye, hinî sey verî nîyo. Hêzê artêşa Sûrîye tîya çîn ê. Coka hetê leşkerî ra rewşe bedilyaye. Bedilnayîşêk do bibo. Nika rew o. La semedê ma çîyo muhîm oyo ke herême bêro pawitene. Ganî hukmatê Sûrîye zî çareserîya sîyasîye qebul bikero û game bierzo. Çereserîya meseleya kurdan nêwazenê  la ganî hinî game bêro eştene verê çareserî de asteng mebê.

Çareserî hinî têna destê hukmatê Sûrîye de nîya. Xeylê hetê çareserîye est ê. Hukmatê Sûrîye zî ganî nê qebul bikero. Hukmatê Sûrîye hinî nêeşkeno sey verî her çî red bikero. Hêzê mîyanneteweyîyî, Neteweyê Yewbîyayeyî ganî hinî semedê çareserîya sîyasîye cehd bikerê. Ganî îdareyê Rojawan bibo parçeyê çareserîye.

DAÎŞ seba wird hetanê Firatî zî tehluke yo. Ganî ma wird hetan zî bifikîr yê. Semedê çareserîya nê probleman hazirê ke HTŞ zî tede her kesî reyde pêvînayîşan bikerê.  Waştişê ma pawitişê şarê ma yo. Ma semedê statuyê sîyasîyî cehd kenê. Kam ke nê biwazo ma pozîtîf nizdî benê. Senî ke Tirkîya vana ma tehlukeyêk nîyê. Bi waştişê nê vatişan vila kenê. Çîyo ke ma eleqedar keno pawitişê herêma ma yo.''

Rojhilate Efrin zî nê vat:

"Şervanê cinîyî esîr kewtî. Tay cinîyê ke binê nameyê Şehîd Jiyan Tolhildan de xo rêxistine kerd mîyanê nê esîran de yê. Tirkîya û çeteyê ci tewr zaf dişmenîya cinîyan kenê. YPJ û hêzê ma yê bînî do cewabê hêrişan bidê. Ganî dewleta tirke û grûbê çeteyan ke pabesteyê ci yê mehkemeyanê mîyanneteweyîyî de bêrê muhakemekerdene. Şexsê cinîyan ê esîran de ganî qesasê nê bêro girewtene. Ma sey YPJyî qerardar ê ke ma do şarê xo û cinîyan bipawê. Badê nê qewimîyayîşan hêrişanê DAÎŞî dest pêkerd. Vera nê ganî heme şarê ma hazir bo û xo rêxistin bikero. Eynî wextî de ganî pozîsyonê pawitişî de bibo yew. Senî ke ma heta ewroyî cewab da ma do ewro ra tepîya zî pawitişê xo bidomnê.''