25-26ê êlule de Hesekê de Konferansê Akademîya Jineolojî ya 2. ya Rojawanî bi şîarê 'Zanayîya Cinîyan bi Jineolojî Newe Bena' ame kerdene. 300 delegeyî tewrê konferansî bîyî.

Konferans de xeylêk babetî ameyî nîqaşkerdene. 

Konferans de standê kitaban zî ame akerdene û tede kitabê cinîyan dîyayî şinasnayene. Ancî bi fotografanê cinîyan ê serkêşan ê sey Hyipatia, Rosa Luxemburg, Sakine Cansız, Zeynep Kınacı, Arin Mirxan, Nagihan Akarsel, Helin Murad, İsyan Armanç, Leyla Agiri, Malda Kusa pêramotişêk ame akerdene.

Konferans bi deyîra Îştare dest pêkerd.

Destpêk de Hemsereka MSDyî Leyla Qehreman qisey kerd.Leyla qalê ci kerd ke krîzanê modernîteya kapîtalîste ra cinîyî raştê teda, hêriş û kerdişanê xiraban yenê.

Dima derheqê perspektîfê Jineolojî û azadîya cinîyan ê Rayberê Şarê Kurdî Abdullah Ocalanî de sînevîzyonêk ame mojnayene. 

Mamostaya Beşê Jineolojî yê Zanîngehê Rojava Evîne Ehmed konferans de qisey kerd û pare kerd ke komelo azad û demokratîk bi şorişê mezgî yê serê erjanê estetîkan mumkîn o.

Endama Merkezê Jineolojî yê Hesekê Alya Osman roniştişê diyînî de metodolojîya Jineolojî ser qisey kerd.

Roja verêne ya konferansî bi kilamanê dengbêjan qedîyaye.

Roja diyîne de Vervatoxa Akademîya Jineolojî Zerîbane Hisên derheqê armanc û metodê perwerdeyanê Jineolojî ser o qisey kerd. Aye ard ziwan ke seba neqlkerdişê zanayîşan perwerde muhîm o û mîrasêko komelkî yo.

Mamostaya Beşê Jineolojî yê Zanîngehê Rojava Zozane Mihemed Şorişê Rojawan de rolê Jineolojî ser o qisey kerd û dîyar kerd.

Endama Xebatanê Akademîya Jineolojî ya Rojhelatê Mîyanênî Zahîde Memo asta globalîzebîyayîşê Jineolojî de qisey kerd û da zanayene ke Jineolojî bi lezî vilayê dinya bena û sey zanistêkî qebul bena.

Peynîya konferansî de sînevîzyonêk ame mojnayene û netîcename ame amadekerdene. 

Konferans bi kayê tîyatroyî yê Koma Folklorî ya Meclîsê Cinîyan ê Armenîyan qedîya.