Têgêrayîşê Cinîyan ê Azadan (TJA) bi şîarê ''Ma cinî yê, semedê azadîye xo estê! Semedê bedilyayîşî payra yê' Amed de dest pê konferansê xo kerd. Konferanso ke 700 delegeyî tewrê ci bîyî do 2 rojî dewam bikero.

Ewropa, Başûrê Kurdîstanî û Tirkîya ra zî xeylêk cinîyî tewrê konferansî bîyî. Hemsereka Pêroyî ya Partîya Demokratîke ya Şaran (HDP) Pervîne Buldan, Hemsereka Pêroyî ya Kongreya Demokratîke ya Şaran (HDK) Îdîle Ugurlu, Hemserekê Pêroyî ya Partîya Herêmanê Demokratîkan (DBP) Salîha Aydenîz, temsîlkarê sazîyanê sivîlan ê komelî û Meclîsê Mayanê Haştîye, maya Fatma Uyar a ke 2016 de Silopî de ameye qetilkerdene Hatîce Uyar û xeylêk cinîyî tewrê ci bîyî.

TJA Wayîrê Herre, Tarîxî û Rayberê Xo Vejîyena

Aktîvîsta TJA Ayşe Gokkan a ke qiseykerdişê akerdişî kerd vat: ''TJA mîraskarê tarîxêkê xorî ya û xoverdayîşê seserran ewro dana domnayene. Ma bi paradîgmaya birêz Ocalanî vera qedexeyan têkoşîn kenê û wayîrê herre, tarîxî û Rayberê xo vejîyenê. Têkoşînê ma de xîyant çîn o. Ma sey cinîyan ê Kurdan çirey têkoşînê xo rê xîyanet nêkerd, çok nêda. Ma do vera hêrişanê îqtîdarî milê xo çewt mekerê û destkewteyanê xo bipawê. Heta ke statuyê Kurdîstan çînê bo rayberê ma azad nêbo rêxistinbîyayîş bi  temamî nêbeno. Coka seba ke birêz Ocalan azad bo ma do her ca de payra bê. Tecrîdê serê birêz Ocalanî vera heme şarê Kurdan û komelê Tirkîya şîdet o. Sîstemê hemserekîye destkewteyanê ma yê tewr muhîman ra ya, ma do aye bipawê. Heta ke cinî azad nêbe komel zî do azad nêbeno. Heta ke heme cinîyî azad nêbê do têkoşînê ma dewam bikero.''

Cînîyê sîyasetmedarê ke zîndan de yê Fîgene Yuksekdag, Sebahate Tuncel, Selma Irmak û Çaglare Demîrel zî bi mesajanê xo konferans silam kerd û na konferans sey gamêka  girde name kerde.