Cinîya bi nameyê Vatfa Ecevît (25) wexto ke lohusaya di rojan bîye 21ê çeleyê 2024î de hetê camêrd Mehmet Şîyar Ecevîtî ra kişîyaye û dadîya ci Nebahate Ecevît zî birîndar bîye. 

Kiştoxî îfadeyê xo de îdîa kerd ke ''o binê tesîrê tîryakî de bibi, ey nêzanayêne ke se kerdo.'' Roniştişê dewaya vera Ecevîtî ewro Mehkemeya Cezaya Girane ya Mêrdînî de do bêro kerdene.

Endama Platformê Cinîyan ê Mêrdînî Gulîzare Îpek derheqê qirkerdişê cinîyan de ANFyî rê qisey kerd.

Gulîzare ard ziwan ke Kurdîstan de xeta kulturê xoverdayîşî est a û vera ney qestî ra konseptê şerê taybetî yeno averberdene. Gulîzare bale ant ser ke Mêrdîn de bi destê hêzanê dewlete tîryakî û tacîzî zêdîyenê û vat: ''Dewlete seba ke îradeyê komelî bişikna metodanê sey tîryakî, fuhuş û ajanîye şuxilmena. Mêrdîn de tecawuz û tacîzan de qiseyê 'mi tîryakî şuxilnabî, nêno vîrê mi' sey pawitişî yeno vatene. Bi nê ziwanî cînayetî yenê normalîzekerdene. Nê pêroyî konseptê şerê taybetî yê.

Vera cinîyan ê kurdan şerêko bêname yeno kerdene. Têkoşînê azadîya cinîyan her ke berz beno cinîyî raştê teda û zorbazîye yenê. Îqtîdarê AKP-MHPyî bi nê ferasetî cinîyan keno hedef. La rixmê hêrişan zî têkoşînê cinîyan do bêmabên dewam bikero.''

Gulîzare venga pêro kesan da ke ewro 15.00 de tewrê roniştişê dewaya vera cînayetê Vatfa bibê û vat: ''Hinî tehamulê ma nêmendo ke ma ra yewe zî kêm biba. Eke ma wazenê verê kişîyayîşê cinîyan bigêrê ganî ma waranê xo hîra bikerê. Xeta têkoşînî û xopawitişî xeta rêxistinîya ma ya tewr pîle ya. Eke sîstem wina bikero ma zî do bi têkoşînê xo cewab bidê ci. Bi na wesîle ma venga pêro kesan danê ke paştdayîşî xurt bikerê û tewrê nê roniştişê dewa bibê.''