Xeylêk bajaranê Kurdîstan û Tirkîya startê çalakîyan ê 25ê Teşrîna Peyêne Roja Têkoşînê Vera Şîdetê Serê Cinîyan a Dinya ame dayene.

 Cizîre-Şirnex

Qezaya Cizîre ya Şirnexî de cinîyan çarçewa çalakîyanê 25ê Teşrîna Peyêne de rayaşîyayîşêk organîze kerd la polîsan bi wesayîtanê zirxinan verê banê HDPyî de rayîrê cinîyan girewt. Mabenê polîsan û wekîla bajarî Nûrane Îmîr de pêrodayîş vejîya. Badê pêrodayîşî cinîyan verê barîyaranê polîsan de çalakîya roniştişî kerde. Cinîyê ke qezayanê Şirnex û Mêrdînî ra ameyî ê zî merkez de ameyî têhet û înan zî ûca çalakîya roniştişî kerde. Cinîyan dima ra barîkatê polîsan rijnayî û ver bi banê HDPyî rayra şîyî û bi cinîyanê bînan ê ke polîsan dormeyê ci girewtbi, bi tîlîlî û sloganan ameyî têhet. Wekîla HDPyî ya Êlihî ke Ayşe Acar Başarana ke tîya qisey kerd vat: ''Heta ke ma tecrîdo ke serê birêz Abdullah Ocalanî de ame destpêkerdene û cinîyan ser o yeno domnayene, meşiknê, ma nêvindenê. Eke xopawitiş sûc o ma nê sûcî rê dewam kenê. Bêrê ma pêro pîya vera dewlete-camêrdî têkoşîn bikerê û xo bipawê.''

Bazîd-Agirî

Qezaya Bazîdî Agirî de zî hetê cinîyan ê HDPyî ra eşkerayîyêke ameye dayene. Verê eşkerayîye polîsan banê HDPyî bi wesayîtanê zirxinan TOMAyan girewt binê ablûqa. Eşkerayîya ke cinîyan  pankertê Ma xo pawenê akerd de hemsereka KCDyî Leyla Guvene qisey kerd. Guvene vat: ''Cinî cuye ya, cinîyan ra metersê. Ma vera zîhnîyetî têkoşîn kenê û heta serkewtişî zî ma do têkoşîn rê dewam bikerê.''

Pirsûs-Riha

Pirsûsê Riha de zî çarçewa kampanyaya Ma Xo Pawenê de hetê TJA û Meclîsê Cinîyan ê HDPyî ra startê çalakîyan ame dayene. Serekwekîla grûba HDPyî Merale Daniş Beştaş, wekîla HDPyî ya Riha Ayşe Surucu, wekîle Remzîye Tosun, rêxistinê HDP û DBPyî yê bajar û qeza tewrê ci bîyî. Polîsan desturê rayraşîyayîşî nêda. Cinîyê ke xeylê wext verê berê banê partîye de vindertî dima eşkerayîye daye. Ame vatene ke hukmat cinîyan ra terseno coka verê înan geno la îqtîdar se keno wa bikero têkoşînê cinîya do ser bikewo.

Anqara

Anqara de Meclîsê Cinîyan Partîya Demokratîke ya Şaran (HDP) bi eşkerayîyêke startê çalakîyanê xo da. Eşkerayîye de ame vatene ke hewteyê 2ê5ê Teşrîna Peyêne de ê do keye, mekteb, cayê karî, meydanan de û her cayê cuye de vera polîtîkaya hêrişkare vengê xo berz bikerê.