Meclîsê Cinîyan ê Jîyane yê Londonî bi wesîleya 8ê Adare Roja Cinîyan ê Kedkaran ê Dinya bi sernameyê ''Kurdîstanî ra heta Dinya Cinî Cuye Azadîye'' panelêk organîze kerd.

Panelo ke Merkezê Komelê Kurdan de ame kerdene aktvîsta Têgêrayîşê Cinîyan ê Kurdan ê Ewropa (TJK-E) Melike Yaşar, aktîvîsta femîniste Anahi Saravia, aktîvîsta îranije Shiva Mahbobi û aktîvîsta afgane Dewa Khan sey qiseykerdoxan tewrê ci bîyî.

Melîke Yaşar bale ante Têgêrayîşê Cinîyan ê Kurdan ke dinya de sey nimûne yeno vînayene ser û vat: ''Ma eşkenê seserra 21. bikerê dewrê xeslinayîşê cinîyan. Ma zanê sîstemo serdest senî bi kayanê leyminan hêriş keno. Coka gerek ma heme cepheyan de rêxistinkerdişê xo xurtêr bikerê. Çar hetanê dinya de cinîyî gerek her wextî ra zafêr pîya têbigêrê, hêzê xo bikerê yew.''

Melîke Yaşar vatişê ''Heta ke cinîya azad mebo, komelo azad nêbeno'' yê Rayberê Şarê Kurdî Abdullah Ocalanî vist vîrî û vat:  ''No pênaskerdiş semedê paradîgmaya ma ya Konfedaralîzmê Demokratîkî zaf muhîm o ke eşkeno verê xelisnayîşê komelî abikero. Têna bi qale vera sîstemî vejîyayîş nêbeno, gerek vera zîhnîyetê camerdê serdestî têkoşîno aktîf  û bitesîr bêro kerdene. Bê têkoşîn azadîye mumkun nîya. Têkoşînê ma têna semedê kurdan nîyo, semedê heme şaranê Rojhelatê Mîyanên o. Ma sey têgêrayîşî hêrişê vera cinîyan sey şerêko nêameyo îlankerdene hesibanenê. Coka wextê averberdişê stratejîyanê hemparan ameyo. Gerek ma çalakîyanê radîkalan bikerê û tîrîfaqê unîversalî înşa bikerê.

Qiseykerdoxanê bînan  zî problemê cinîyan ê dinya girewtî dest û bale ante têkoşînê cinîyan ser ke bi sloganê Cinî Cuye Azadîye her roje girdêr beno.