Endama Meclîsê Kantonê Hesekê Siltane Mihemed Izo ANFyî rê qalê ci kerd ke senî têgêrayîşê azadîye yê cinîyan şinasnayo û Şorişê Cinîyan ê Rojawanî senî qewimîyayo.

Siltane Mihemed pare kerd ke 1985 de aye gerîla Bêrîtane şinasnaya û vat: ''Mi tim waştêne biba cinîyêka têkoşer la mi derûdorê xo ra tersayêne. Wexto ke mi embaze Bêrîtane şinasnaye akey mi rê qalê Têgêrayîşê Azadîye yê Kurdan kerd. Mi vat ke no têgêrayîş goreyê waştişanê mi yo. O çax mi soz da ke destê mi ra çi bêro ez bikera. Dima cade ez tewra xebatan bîya. Wextêkî ra dima dadî û babîyê mi waşt ke mi bizewijnê. Ez zewijîyaya la mi awil mêrdeyê xo ra soz girewt ke do astengê xebatanê mi nêbo. Ez nêweşxaneyêk de wezîfedara weşîye bîya, doktoran hetkarîya mi kerdêne.

2012 de Şorişê Rojawanî reyde xebatê ma zêdîyayî. Ma şerwanan rê erzaq û awe berdêne cepheyanê şerî. Ge ge mêrde û domananê mi nêwaştêne ez şora la ez şîyêne. Mi zanayêne ke ê şerwanan seba ma şer kerdêne. Dima Meclîsê ma ronîya. Meclîs de 27 kesî est bîyî û nînan ra 7 tenî cinî bîyî. Dima 'Keyeyê Cinîyan' ame akerdene, komunê cinîyan û şaredarîyî awan bîyî. Îdareyo Xoser ame îlankerdene. Ma bi 7 cinîyan dest pêkerd û nika ma bîyî bi hezaran cinîyî. Cinîyî nika warê şerî de, mîyanê dezgehan û komelî de cagênê.

Cinîyê ke verê cû nêeşkayêne sereyê xo berî ra vejê nika serkêşîya şoriş û komelî kenê. Sîstemê ma yê hemserekîye pêro dinya rê beno nimûne. Bingeyê paradîgmaya Rayber Apoyî de cinîyî her karî de aver şinê. Ez venga pêro cinîyan dana ke fikranê Rayber Apoyî bizanê. Embaze Zîlane bi roşnîya felsefeya Rayber Apoyî azad bîye û embaze Sema mabênê 8ê Adare û 21ê Adare de bîye pirdêk. Roşnîya nê cinîyan ê têkoşêran ra ewro Swêd de cinîyî fotografanê Hevrîne Xelef akenê û azadîya xo wazenê.''