Têgêrayîşê Cinîyan ê Kurdan ê Fransa (TJK-F) û Komelê Demokratîkî yê Kurdan ê Fransa (CDK-F) derheqê Qirkerdişanê Parisî yê 2013 û 2022yî de eşkerayîyêke daye û seba beşdarîya rayraşîyayîşê Parisî yê 6ê çeleyî veng da.

Eşkerayîye wina ya:

''3 cinîyê kurdî yê şorişgêrî Sakîne Cansiz (Sara), Fîdane Dogan (Rojbîne) û Leyla Şaylemez (Ronahî) 9ê çeleyê 2013î de Paris de hetê îqtîdarê AKP-MHPyî yê faşîstî ra bi destê MÎTî ameyî qetilkerdene.

Par serrgêra 10ine ya nê qirkerdişî de zî embaza ma Evîne Goyî wexto ke amadekarîya merasîmanê yadkerdişê Qirkerdişê Parisî kerdêne, embazê ma Mîr Perwer û welatperwer Abdurrahman Kizil 22yê kanûna 2022yî de Paris de ameyî qetilkerdene.

Rixmo ke Qirkerdişê Parisî yê 2013î 11 serrî xo pey de verdayî hema zî dewleta Fransa bi zirxê 'sirê dewlete' no qirkerdiş roşnî nêkerd û dewayêke anêkerde. Bi nê hawayî zî zemînê Qirkerdişê Parisî yê Diyînî amade kerd. Eke dewleta Fransa Qirkerdişê 2013î de mesuldarîya xo bikerdêne Qirkerdişê Parisî yo Diyîn do nêqewimîyayêne.

Nê wird qirkerdişî de çarçewa polîtîkaya qirkerdişî ya vera kurdan û têgêrayîşê azadîye yê cinîyan ê kurdan de ameyî kerdene.

Rayber Apoyî Qirkerdişê 9ê Çeleyî sey 'Terteleyê Dêrsimî yê Diyînî' pênase kerdbi û vatbi ke 'Ha Sakîne kişîyaye, ha ma kişîyayê.' Roşnîkerdişê Qirkerdişanê Parisî bi azadîya Rayberîya ma beno ke binê tecrîdê Îmraliyî de yo. Ganî ma vera hêriş û qirkerdişan dormeyê paradîgmaya Rayberê xo de bêrê pêser.

Sey teqîbkerdoxanê embazanê xo yê şehîdanê Qirkerdişanê Parisî vera hêzanê komplogeranê ke hêrişê cinîyan û şarê ma kenê ma azadîye de israr kenê. Têkoşînê azadîya cinîyan de israr; parçekerdişê kodanê sîstemê serdestîya camêrdan de israr o. Coka şorişê cinîyan do qesasê ma bibo.

Roje a roj ake ma seksîzm, mîlîtarîzm, nîjadperestî û bêedaletîye ra hesab bipersê. Edalet, azadî û demokrasî do bi xoverdayîşî bêrê caardene. Naye ser o sere de cinîyî ma venga pêro kurdîstanijan û dostanê xo danê ke 6ê çeleyî de kuçeyanê Parisî debikerê.''

Derheqê ca û saeta kombîyayîşê rayraşîyayîşî de nê agahîyî dîyayî:

6ê çeleyê 2024î

Saete: 10:00

Ca: Gare du Nord