Mayanê Şemeyî hewteyê 811. yê çalakîyanê xo de  aqîbetê Cemîl Kirbayîrî persa ke 13ê êlula 1980î de dima ke amebi destbenkerdene dîya vînkerdene.

Hêverî birayê Cemîl Kirbayirî Mîkaîl Kirbayirî aqîbetê Cemîlî persa û vat: ''8ê teşrîna verêne ya 1980î de dima ke tehqîqatê biramî mi qedîya ame kiştene. Kişîyayîşê birayê mi ser ra 40 serrî vîyartî la hema zî aqîbetê ci nêzanîyeno.''

Waya Cemîl Kirbayirî Fatma Kirbayir zî vat: ''Ma her ca de gêrayî ey, ma muracatê her cayî kerd. Ma venga Serekkomarî danê ke wa wasîyetê dadîya mi bîyaro ca. Ey soz dabi ma la nêard ca. Esteyê birayê mi bidê, wa dadîyî hînî mebermê.''

Hemsereka ÎHDyî Erene Keskîn zî ard ziwan ke dima ke Kirbayir ame destbendkerdene hînî nêame dîyene. Erene Keskîn vat: ''Serra 2010î de Mayanê Şemeyî Serekwezîrê ê çaxî Recep Tayyîp Erdoganî reyde pêvînayîş kerdbi.  Erdoganî soz dabi ke na mesele safî bikero. Sozo tewr pîl zî dabi Dayîka Berfo. Vat 'Ez do lajê to bivîna.' Dima Meclîs de raporê ame amadekerdene. Komîsyonê Heqanê Merdiman îsbat kerd ke Cemîl Kirbayir wextê nezaretî de bi îşkence ameyo kiştene. Dima Dozgerîya Qersî tehqîqet da destpêkerdene. La çîyêk nêqewimîya. Derheqê serebûtî de bira bêpeynî dîyaye û zanayîş nêdîya keyeyî. Serra 2011î de reyna tehqîqat ame akerdene. La reyna çîyêk nêvurîya. Ma vînenê ke rayîrê huqûqê zereyî qedîyayî. Ma muracatê Mehkemeya Qanûnê Bingeyî kerd.''

Dima kênaya Îlhan Erdosto ke serra 1980î de îşkence de ame kiştene, Alaze Erdost vat: ''Kirbayir wendekarê Enstîtuyê Perwerdeyî yê Qersî bi. Darbeya 12ê Êlule ra rojêke dima 13ê êlule de leşkeran dewa Okçuyî ya Erdexanî de eşt keyeyê ci ser û o destbend kerd. Cemîl Fermandarîya Îdareyê Kolorduyî ya 9. ya Qersî de ameyêne tepiştene. 25ê êlule de leşkeran vat ke 'Cemîl fîrar kerdo.' Babî Îsmaîl Kirbayirî muracatê her cayan kerd. La pêro cigêrayîşî bênetîce mendî. Reyna tira xeberêke nêameye girewtene.''