Nêrazîbîyayîşê vera alozîya ke PDK xîret keno ke bikero dewam kenê. Mayanê Haştîye bale ante tehlukeyanê muxtemelan ser û  ard ziwan ke yewîya neteweyîye ganî bêra awankerdene.

Maya Haştîye Emîne Erbey îfade kerd ke meseleya bingeyîne ya kurdan canêardişê yewîya neteweyî yo. Dayîke Emîne vera têkilîya PDK û Tirkîya nêrazîbîyayîşê xo mojna û vat: ''Her kerra û herra Kurdîstanî de esteyê domananê ma estê. Zulmo ke na dewlete kurdan rê kerd nêdîyayo. Hînî bes o. Ma haştîye wazenê. Ma Barzanî sey parçeyêkê ganê xo hesibnenê. Ganî wina nêkero. Yew faydeyê alozîye kurdan rê çin o. Çareserîya meseleya yewîya neteweyî ya. Ganî ma wayîrê yewbînan vejîyê. Eke mîyanê ma de şerêk biqewimo ma do pêro pîya bin bikewê.''

Dayîke Gulsume Dag venga Mesûd Barzanîyî da û vat: ''Wa Barzanî nê tewirê xo ra fek vera bido. Ma venê haştîye o vano şer. Ma hînî nêwazenê hêsirê ma bêrê war. Her kes cara hêrişê kurdan keno. Barzanî vano 'erdê mi ra vejê.' Uca erdê ma yê pêroyînan o. Eke ma bibê yew ma eşkenê heqê zehmetîyan ra bêrê. Kurdî pê yewîye do ser bikewê.''

Maya Haştîye Gulere Bugday zî vat: ''Ewro birakujî reyna rojdem de ya. Ma venga Barzanîyî danê ke wa pê nê kayan mexepîyo. Kurdî hewcedarê haştî û yewî yê. Wa ê biewnê tarîxî û bivînê ke birakujî bîye netîceya çita. ''