Çalakîyê nobete yê mayanê tepişteyan ê seba bale biancê serê grevanê vêşanîye û rojeyê mergî ke seba şikitişê tecrîdê giranî yê serê Rayberê Şarê Kurdî Abdullah Ocalanî ameybî destpêkerdene dewam kenê. Ê mayanê tepişteyan ra yewe zî Hatîce Soyler a ke vernîya Zîndanê Gebze de rixmê heme astengîyan de çalakîya xo domnena, aye ANF’yî rê qisey kerd.

Maye Soylere vat seba paştdayîşê keynaya xo Ozlem Soylere û heme tepişteyanê bînan ê ke 16’ê Kanûne ra nata grev de yê, aye Îzmîr ra amîya Stenbol. Maye Soylere vat: “Dereceya bicaardişanê keyfîyan ya Gebze resaya nuqtayêk ke nêverdanê mayî seba domananê xo ronişê, mayî bêrê têhet yan zî şirê sûke, polîsî vernîya ma gênê. Ma şirê kamca ê ma şopnenê.”

‘Bedenê Înan Helêno’

Maye Soylere vat: “Ez her reye keynaya xo vînena, la wina aseno ke aye xeylî kilo dayo. Xora keynayêka zihîfe bîye; nika bi temamî helîyaya. Her çend ê bihuyê zî halê înan çiqas şino hîna beno xirab.

Maye Soylere derheqê vatişê wezîrê Edaletî Abdulhamît Gulî yê ‘qedexeyê pêvînayîşî yê Îmraliyî qedîyayo’ de zî qisey kerd û vat, “Edalet do rojêk seba her kesî lazim bo. Ma nêwazenê ke tabûtê domananê ma zîndanan ra vejîyê. Ez tîya ra xusûsen veng dana Emîne Erdogane, wa sey mayêk biewnîro halê ma ra. Hendî bes o.”