Meclîsê Cinîyan ê HDKyî  bi wesîleya 25ê Teşrîna Peyêne Roja Têkoşînê Verê Şîdetê Serê Cinîyan verê Operaya Sureyya de qezaya Kadikoyî ya Îstanbulî de çalakîyêke kerde. Wekîla HDPyî Zuleyha Gulum, Hemvervatoxa HDKyî Îdîle Ugurlu, Hemsereka HDPyî ya Îstanbulî Elîfe Bulut zî tede xeylêk cinîyî tewrê çalakîye bîyî.

Îdîle Ugurlu çalakîye de qisey kerd û vat: ''Têkoşînê cinîyan dewam keno û roje bi roje geş beno. Vera hêrişan ma meydanan de yê. Ma xo ver danê û ma pîya xurtêr ê.''

Wekîla HDPyî Zuleyha Gulum zî çalakîye de vay: ''Ma do vera şîdetê dewlete û camêrdan sereyê xo nêarê war. Ma do nêbê cinîya mehqûleya hîşmendîya camêrdan. Seba têkoşînê azadîya cinîyan ma do têkoşînê xo her ca de pîlêr bikerê.''

Hetê bînî ra Meclîsê Cinîyan zî rayberîya Platformê 'Ma do verê kişîyayîşê cinîyan bigêrê' (KCDP) de Kadikoy de çalakîyêke kerde. Keyeyê cinîyanê ke ameyî kiştene çalakîye de tewr vernî ra şîyî. Temsîlkara Tirkîya ya KCDPyî Gulsume Kav çalakîye de qisey kerd û ard ziwan ke têkoşîno hempar seba çareserîta şîdetê vera cinîyan şert o. Kave vat: ''Ma do emser nêverdê ke manşetan de xebera kişîyayîşê cinîyan cabigêra.''