Meclîsê Cinîyan ê HDPyî 27ê kanûne de kombîyayîşê xo kerdbi û netîcename reyde xeta xo ya têkoşînê polîtîkî ya dewrê neweyî bi eşkerayîyêke pare kerde. Eşkerayîye bi sernameyê 'Serra 2021î do biba serra geşkerdişê têkoşînî' weşanîyaye. Cinîyan kombîyayîşê xo dîyarîya Leyla Guven kerde.

Netîcename de ame parekerdene ke serra 2020î seba cinîyan bîye serra têkoşîn û xoverdayîşî û na rewşe wina do dewam bikera. Cinîyan îfade kerd ke seba ke AKP-MHP qels bîyê pê hêrişanê vera hemserekîye, Peymana Îstanbulî, destkewteyan û qeyûman kenê ke payan ser o bimanê.

Netîcename de dîya zanayene ke ê do têkoşînê xo rê fek vera nêdê û her ca de ke tede vera cinîyan şîdet esto vengê xo berz bikerê. Ame vatene ke îqtîdarî têna zere de nê Başûr û Rojawanê Kurdîstanî de zî vera kurdan sîyaset kerd û o wazeno pêro destkewteyanê kurdan çin bikero.

Eşkerayîye wina dewam kena: ''Cinîyê ke îradeyê haştî û azadîye seba yewîya neteweyîye vet werte do ser bikewê. Zîndanan de tepişteyan vera tecrîd û binpaykerdişê heqanê xo dest pê grevê vêşanîye kerd. Ganî cade waştişê înan bêrê qebulkerdene û çareserkerdene. Ma bira tepişîyayîşê Leyla Guven qebul nêkenê. Seke Leyla Guven vat ma zere û teber de têkoşînê xo bêmabên dewam bikerê. Serra 2021î de têkoşînê ma Meclîs, kuçe, meydan, fabrîka, axpîn, zanîngeh û her ca de do dewam bikero. Ma do vera serdestîya camêrdan payan ser o bibê.''