Meclîsê Cinîyan ê HDPyî: Ma do cuya azade awan bikerê

Meclîsê Cinîyan ê HDPyî netîcenameyê kombîyayîşê xo yê 10 êlule  eşkera kerd.  Cinîyan vat ê bêçare nîyê, do cuyeya newî ya demokratîke awan bikerê.

Meclîsê Cinîyan ê Partîya Demokratîke ya Şaran (HDP) netîcenameyê kombîyayîşê xo yê 10 êlule eşkera kerd.  Kombîyayîş şexsê Denîze Poyraza ke Îzmîr de ameye qetilkerdene heme cinîyê ke ameyî qetilkerdene rê ame dîyarîkerdene.

Netîcename de nê ameyî vatene: ''Ma vera hêrişanê ke vera şar, destkewteyan, xoza, îrade û waranê cuya ma yenê kerdene, xoverdayîşê rêxistenkerdeyî danê û xoverdayîşê xo pîlêr kenê. Îqtîdaro camêrd ê  AKP-MHPYî dişmenîya cinîyan û kurdan ser ra polîtîkaya leyşin a şerî rayra beno. Rolo ke Afganîstan de girewto xo ser semedê cinîyan ê Rojhilatê Mîyanênî tehdîto pîl o. Sey Rojawan û Şingalî ma vînenî ke Afganîstan de zî cinîyî xover danê. Ma xoverdayîşê înan selam kenê

Polîtîkayanê şer û şîdetî ra tewr zaf ma cinîyî dej ancanê. Cinîyî rîyê nê polîtîkayan ra mecbur mananê ke erdê xo caverdê û rayîrê koçbarî de raştê her qeyde hêrişê îstîsmarî yenê. Cayanê ke resenê ci de zî raştê neheheqîye yenê. Ma 17 bajaran bi şîarê ''Feqîrîya Cinîyan rê nê, Semedê Cinîyan Adelet'' cinîyan reyde ameyî têhet. Ma reyna soz danê ke ma do vera feqîrîya cinîyan têkoşîn bikerê. Vera polîtîkayanê şer û şîdetî ma cinîyî do pêro pîya cuyeyêka azad a demokratîke awan bikerê. Ma do paştdayîşê cinîyan xurtêr bikerê û îqtîdarî ra hesab bipersê.

Ma do vera îtîfaqê camêrdî yo ke seba ke payra bimanê heme metodanê hêrişî şuxulneno, îtîfaqê xo yê yewbîyayîye pîlêr bikerê. Qetilkerdişê hemraya ma Denîze Poyraz, qirkerdişê Konya û qetilkerdişê Mîhraç Mîrogluyî pabesteyê polîtîkaya şerî yê îqtîdarî yê.  Ma reyna tîya ra vanê. Ma do paştî bidê têkoşînê edaletî yê Emîne Şenyaşar, ma do persayîşê Gulîstane Doku ha ça? rê dewam bikerê. Ma do vera neheqîye bêveng memanê. Ma do destûr nêdo ke îqtîdaro camêrd dest ameyoxê cinîyan ê ciwanan serano.

Sey heme dinya Îqtîdarê Tirkîya zî cinîyan û estbîyayîşanê ekolojîkan sey dişmenî vîneno keno ke çîn bikero. Kurdîstan de şewatan û felakatanê leserî rê mudaxale nînokerdene. Ma cinîyî ça beno wa bibo vera qirkerdişê xoza bêveng nêmanenê. Ma do destûr nêdê ke xoza û warê ma yê cuye pê polîtîkayanê rant û talanî bêrê çînkerdene.Vera polîtîkayanê şîdet û û şerî yê ke dişmenîya cinîyan û kurdan ser ra yenê kerdene ma do têkoşînê cuya hempare û azade rayara berê.

Bi ziwan, kultur û bawerîyanê cîya cîyayan mantişê cuyeyêka seyyewbîne mumkun o. Ma do semedê azadkerdişê hemrayanê xo yê ke zîndanan de yê têkoşînî pîlêr bikerê. Seba ke ziwanê dayîke de deyîre ameye vatene cinîyî ameyî cezakerdene.  Ma tîya ra reyna vanê. Ziwanê dayîke heq o, çew nêeşkeno ey qedexe bikero. Ma cinîyî pê ziwanê dayîke, rengan û nasnameyanê xo estbî, estê, do tim bibê. Ma cinîyî bêçare nîyê. Vera hêrişanê îqtîdarê camêrdî wextê pîlkerdişê paştdayîşî yo.''