Jîna Emînîya ke Rojhelatê Kurdîstanî ra bîye perar Tehran de seba ke 'gijikê ci asayêne' hetê polîsanê dewleta Îranî ra amebî qetilkerdene. Dima Rojhelatê Kurdîstanî û Îran de vera tedayanê rejîmê dewlete serkêşîya cinîyan de û bi şîarê 'jin, jiyan, azadî' serewedaritiş dest pêkerdbi. 

Sîrwa Ehmedî û Efrîne Razaî yê ke tedayanê Îranî ra neçare mendbî ke koçê Swîsre bikerê derheqê babete de ANFyî rê qisey kerd.

Sîrwa Ehmed pare kerd ke înan dî ke sloganê 'Jin, Jiyan, Azadî' resayo pêro dinya û vat: ''Ma bi kîlometreyan dûrê welatî de yê. Beno ke sey Jîna ez zî do biameyêne kiştene. Mesele teyna gijikê ma nêbi. Mesele heman wextî nasnameyê ma yê kurdayetîye û cinîtîye yê. Wexto ke ma şîyêne çalakîyanê Swîsre mi dî ke waştişê cinîyanê tîyayî zî waştişanê ma ra cîya nîyê. Meseleyê cinîyan global ê. Coka ganî cinîyî mi bidê milî û pîya têkoşîn bikerê.''

Efrîne Razaîya ke şaristanê Sine yê Rojhelatê Kurdîstanî ra ya, Endama Rêxistina Têkoşînê Cinîyan a. Efrîne vat: ''Çimeyê azadîya cinîyan û komelî, komel bi xo yo. Sloganê ma 'Jin, Jiyan, Azadî' derbêka pîle daye dîktatorîyan. No slogano ke verê cû teyna kitaabanê Rayber Apoyî de vîyartêne nika fekê pêro dinya de yo û beno sebebê yewîya cinîyan. No zî asta hişmendî û waştişanê roşnvîranê kurdan eşkera keno. Cinîyê kurdî azadîye wazenê.''