Amed de mîtîngo ke serkêşîya TJA û Meclîsê Cinîyan ê DBPyî de yeno kerdene Meydanê Îstasyonî de dest pê kerd.

Mîtîngo ke bi şîarê ''Nîjadperestîye û cînsîyetkarîye rê bes o, nika wextê azadîya cinîyan o'' yeno kerdene wekîlê HDPyî, Mayê Haştîye, Rêxistinê Komelê Sîvîlî, KCD, OHDyî ra zî xeylêk kesê tewrê ci bîyî.

Warê mîtîngî de fotografê Denîze Poyraz ameyî daliqnayene. Semedê dekewtişê warê mîtîngî xeylêk nuqtayê kontrolî ameyî ronayene. Cinîyê ke bajaranê bînan ê Kurdîstanî ra ameyî sey kortejî pê tîlîlîyan kewtî warê mîtîngî.Tîlîlîyanê cinîyan erd û asmên zilzilnayî.

Maya Haştîye Hatîce Beyrut seba ke destê ci de flamaya hewz, çeqer û sûrî estbî ameyî destbendkerdene. Cinîyan vera cigêrayîşê barîyî nêrazîbîyayîş ramojna. Avûkate Elîf Dîrenç Îpekî zî rixmo ke nasnameyê xo ramojna polîsan waşt serê aye bigêrê. Ulaşa vera naye vejîyayî hetê polîsan ra ameye derbkerdene. Ulaşî semedê gerrekerdişî verê xo da asayîşî.

Wekîla HDPyî ya Şirnexî Nurane Îmîr xîtabê cinîyan kerd. Îmîrî vat: ''Ma soz dayo Sakîn, Leyla, Sevê, Asya û Pakîzeyan, ma do tim meydanan de bê. Ma koletîye qebul nêkenê. Serkêşê têkoşînê ma yê ke zîndanan de yê ma înan selam kenê. Denîze Poyraze qetil kerd û cinîyan ê têkoşêran erzenê zîndanan.  Her ca de hêrişê destkewteyanê cinîyan kenê la nê pê zîndanan ne zî pê qetikerdişan nêeşkenê verê ma bigîrê.''

Dima ra  maya Denîze Poyraza ke banê HDPyî yê Îzmîrî de ameyî qetilkerdene Fahîme Poyraz qisey kerd. Poyraze vat: ''Semedê mi şima pêro Denîze ê. Ganî pêro pîya destê yewbînan tepişê. Ganî ma bibê yew. Denîze Poyraz bîlasebeb bêpawitiş banê HDPyî yê Îzmîrî de ameye qetilkerdene. Denîze têna ya mi nêbî a Denîza welatî bî. Vanê qetilkar gej o la gej nîyo. Eke gej bîyênî zirar dayêne xo, kênaya mi nêkiştêne. Gama ke maye Poyraze qisey kerdêne slogana 'Şehîdî Nêmirenî' bîye berze.''