Komeleya Rojnamegeran ê Cinîyan a Mezopotamya (MKG) raporê xo yê binpaykerdişê heqanê vera rojnamegeran ê cinîyan bînaya ÎHDyî ya Îstanbulî de bi eşkerayîyêke pare kerd.

Endama MKGyî Dîrene Yutsever da zanayene ke 2023 de ê raştê tedayanê pîlan ameyî la rixmê nînan zî 2024 de têkoşînê xo rê do dewam bikerê.

Endama MKGyî Salîha Aras îfade kerd ke bi taybetî rojnamegerê kurdî hetê hêzanê asayîşî yê dewleta tirke ra yenê hedefkerdene.

Rojnamegere Eşane Arica rapor wend. Rapor de ca dîya nê binpaykerdişanê vera rojnamegeran ê cinîyan:

-Serra 2023yî de 68 rojnamegerî ameyî muhakemekerdene, derheqê 32 rojnamegeran de tehqîqat ame akerdene, derheqê 13 rojnamegeran de dewa ameye akerdene, 37 rojnamegerî ameyî desbendkerdene, 11 rojnamegerî tepişte yê, 33 rojnamegerî raştê şîdet û kerdişanê xiraban ê polîsan ameyî, emser 5 rojnamegerî tepişîyayî, 8 rojnamegeran rê ceza dîyaye, venga 11 rojnamegeran dîya ke wa îfade bidê, 2 rojnamegerî medyaya dîjîtale de ameyî hedefkerdene, 2 rojnamegerî ameyî tehdîtkerdene, gerreyê yew rojnamegere ameye kerdene, 10 rojnamegerî wextê teqîbê xeberan de ameyî astengkerdene, 9 rojnamegerî karî ra ameyî vetene û yew rojnamegere zî netîceya mobbingî de îstîfa kerd.