Wekîla HDPyî ya Wanî Muazzeze Orhan qirkerdişê Denîze Poyraz û dewaya qefilnayîşê HDPyî ANFyî rê ercnayî.

Muazzeze Orhan vist vîrî ke tarîxê sîyasetê kurdan de sey ê Denîze Poyraz xeylêk qirkerdişî estê û vat: ''No hêriş ne têna vera kesêke bi ne zî têna vera HDPyî bi.Tirkîya de ekonomî rijîyaye, merdimî îqtîdarî ra ecîz ê. Sebebê ney zî tecrîd o. Merdimê terefgîrê haştîye û demokrasî seba qedînayîşê himendîya tarîye pîya têkoşîn bikerê. Qirkerdişê Denîze Poyraz hêrişêko ferdî nîyo. No kes (Onur Gencer) Rojawan de tewrê cerganê SADATî bîyo. No hêriş vera demokrasî, haştîye û cuya pîya ame kerdene û hêrişêko plankerde yo.

No kes senî şîyo Sûrîye û senî agêrayo. Ganî derheqê ney de agahîye bêra dayene partîya ma. Şiklê destbendkerdişê kiştoxî her çi eşkera keno. Wexto ke wendekarî îqtîdarî rexne kenê polîsî beran şiknenê wendekaran destbend kenê. La polîsî nê kiştoxî seke kenê verarê xo.  Çîyê ke nê welatî de qewimîyenê polîtîkayanê îqtîdarî ra cîya nîyê.''

Orhane derheqê dewaya qefilnayîşê HDPyî de zî wina qisey kerd: ''Na dewa pê fermanê Serekkomarî ameye akerdene. Xora Erdoganî vatbi 'ez gol nêdana Mehkemeya Qanûnê Bingeyî.' Ma zî na mehkeme ra birêka xosere nêpawitêne. La eke mehkeme dosya hol biercna û birêka edîle bida welat mîyanê tarîtîye ra vejîyeno. Ma reyna venga cinî, kedkar û şaranê Tirkîya danê ke wayîrê kede û ameyoxê xo vejîyê. Ma venga her kesî danê ke vera qirkerdişan têkoşîn bikerê. Ma pêro heman keştîye de yê. Eke keştîye cumê awe biba ma pêro xeniqîyenê. Ma venga şaranê Tirkîya danê ke seba ameyox, wayûbiratîye û roşnîye pîya têbigêrê.''