Hemşaredara Wanî Neslîhane Şedal ANFyî rê bi wesîleya Roja Cinîyan a Dinya ya 8ê Adare qisey kerd. 

Neslîhane îfade kerd ke polîtîkaya qeyûman vera nasname û ziwanê cinîyan ê kurdan hêrişêk o. Neslîhane vat: ‘’Bi hêrişê vera cinîyan ê wazenê komelî bêveng bikerê. La cinîyî vera nê hêrişan têkoşînêkê xurtî kenê.’’

Neslîhane tayînkerdişê qeyûman ê vera 14 şaredarîyanê Wanî ercna û vat: ‘’Tayînkerdişê qeyûman parçeyêkê hêrişanê vera cinîyan o. Cinîyan bi dezgeh û atolyeyanê xo cuyêka azade awan kerde. La qeyûman dest na nînan ser.Qeyûmî nêwazenê cinîyî keyeyî ra zî vejîyê.’’

Neslîhane pare kerd ke xîret yeno kerdene ke qirkerdişê cinîyan bêro girankerdene û vat: ‘’Wexto ke qeyûm ameyo tayînkerdene hêverî hêrişê cinîyan kerd. La cinîyan vera nê hêrişan îradeyêko pîl mojna. Ver bi 8ê Adare zî cinîyî do vera polîtîkayanê şerê taybetî û qeyûman waran debikerê.

Ganî bi serkêşîya têkoşînê cinîyan haştîye bêra caardene. Seba cuyêka rûmetêne ma bi şîarê ‘Jin, Jiyan, Azadî’ vejîyê waranê 8ê Adare. Ma wazenê bi azadîya Birêz Ocalanî û bi xîretê haştîye atmosferê dîyalogan biafernê. Vera qeyûman her warî de veng, fikr û têkoşînê cinîyan do berz bibê. Ma venga pêro cinîyan danê ke vejîyê waranê 8ê Adare.’’