Operasyonê îqtîdarî yê krîmînalîzekerdişê HDPyî dewam kenê. Hem bi destsernayîşê şaredarîyan û tepiştişan hem zî bi ajankerdişan îqtîdar polîtîkayanê xo ano ca. Endama HDPyî Sevene Ozyildirim zî înan ra yew a ke polîsan gef ro ci wend û kerd ke Ozyildirime biba ajana înan. Ozyildirim derheqê babete de ANF reyde qisey kerd.

Ozyildirima ke taxa Gulsuyu yê Maltepe de mamena serebûto ke 26ê teşrîna verêna 2019î de qewimîyo ra wina behs kerd: "Serê sibayî saete 10:00 de komîserêkê bi nameyê Ahmetî telefon kerd û seba îfade venga mi da ke ez şora merkezê polîsan. Seba ke mêrdeyê mi tepişte bi ez bi cîranê xo şîya. Wexto ke ma resayî qeraqol, mi telefonê xo da cîranê xo û mi tira vat ke eke ez mîyanê 10 deqayan de nêra xebere bidê avûkata mi. Ez şîya û polîsêkê verê mi de ez berde odayêka bêkamerayan. Zere de bi polîsêkê sivîlî 5 polîsî estbî. Mi ra persê kêneya mi Berfîne kerd. Vat Berfîn ha ça de ya, şîya koyan ser yan. Mi zî va  remaya ez nêzanena ha ça de ya. Polîsan mi rê fotografî mojnayî ke koyî de amebî antene û îdîa kerd ke ê Berfîne yê. Ez verê ci vejîya û mi va nê fotomontaj î. Dima mi rê persê mêrdeyê mi kerd ke tepişte yo. Mi nêrazîbîyayîşê xo mojna û mi va ke mêrdeyê mi bi hawayêkê bêhuqûqî ame tepiştene. Mi rê persa va ke 'Mêrdeyê to kêneya to erşawite koyan ser?' Mi zî vat ney. Mi rê hêrs bîyî û yewêk vat ti çira çîyêk nêzanena."

"Polîsan mi ra va ke erzaq û komirê to esto, cinîyêka bêmêrde senî Îstanbulî de têna ciwîyena. Mi rê va ke eke ez înan rê hetkarî bika ê zî do mi rê bikê. Mi rê va ke'Ti cinîyêka rind a. Eke ti wazena mi reyde yan zî embazê mi reyde şore nan biwerî.' Wexto ke mi nê qsieyî eşnawityî ez zaf hêrs bîya û ez werişta payan ser. Polîsî reyna vat 'wexto ke ti şore HDP uca de çi bêro qiseykerdene ma rê vaje. Eke ti naye qebul bike, mêrdeyê to do bivejîyo teberî. Ti nêwazena domanê to dibistanêka taybete de biwanê? Na hûmara min a. Baş bifikîre, na seba to şansêk a.' Dima polîsî gef ro mi werd û waşt ke hayîya mêrdeyê mi pê çînêbi ke tîya de se bibo."

Ozyildirime wexto ke qeraqolî ra vejîya avûkata xo de qisey kerd û rewşe aye reyde pare kerd. Ozyildirime tersena ke cuya aye, yê domananê ci, yê mêrdeyê ci binê tehlûkeyî de ya. Ozyildirime vat eke çîyêk bêro sereyê înan dewlete berpirsîyar a.