Koordînasyonê PAJKî bi wesîleya Newroze eşkerayîyêke daye. Eşkerayîye wina ya:

‘’Newroza 2025î ya ke ma hîna nêzdîyê azadîya Rayberîye yê, Rayber Apoyî rê, cinîyanê azadîgîran rê, şarê kurdî rê û pêro şaranê herême rê fîraz ba.

Mazlûman, Ronahîyan, Bêrîvanan, Zekîyeyan, Rahşanan û ê bînanê ke adirê Newroze vistibi ta û xo kerdibi Newroze ma nînan bi rêz, heskerdiş û minetî yad kenê.

Şarê ma sey teqîbkerê Kawayê Asinkerî bi hezaran serran o xo ver dano û Newroze sey roşanê azadîye fîraz keno. Pêro şarê ma û cinîyan rê selam bo ke ê Newroza 2025î bi şîarê ‘Rayberîya Azade û Komelê Demokratîkî’ visnenê leweyî.

Şarê kurdî şarê Newroze yo. Cinîyê kurdî zî afernayoxê kulturê xoverdayîş, newebîyayîş, xoverdayîş û komelkîbîyayîşî yê Newroze yê. Eke ewro no xoverdayîş dewam keno no xêrê xoverdayîşê cinîyan ê kurdan ra yo. Kurdî na cografya de bîyî kerdoxê cuya azade û demokratîke.

Newroze a roja ke tede tayê ciwananê kurdan vera qirkerdiş û kolonyalîzmî ala xo akerdibî. A roje Zîndanê Amedî yê zulmkarî de bi şîarê ‘Xoverdayîş ser visneno’ Mazlûm Doganî serkewtişê rûmetî îlan kerdibi.

Newroze nameyê serewedaritişê 90an ê vera qirkerdişî yo. Newroza 2005î zî roja îlanê Konfederalîzmê Demokratîkî û cuya azade û demokratîke bîye. Şarê kurdî tim Newroze kerde destpêk û mîladêko newe.

Na Newroze zî do biba mîladêko newe. Bi vengdayîşê Rayberîye prosesê Haştîye û Komelê Demokratîkî bi têkoşînê şarê ma û cinîyan do hîna bihêz bibo. Şarê ma do seba azadîya Rayber Apoyî waran de yew bibo û bi berzî biqîro. Na Newroze do biba Newroza Rayberîye.

Cinîyanê ma bi vengdayîşê Rayberîye çalakîyê xo yê 8ê Adare resnayî Newroze û hîna bi berzî kuçeyan de bi qîrayîşî vat ke ‘Azadîya Rayberîye azadîya cinîyan a.’ Têkoşînê cinîyan ê azadan do merkezê xo bikerê azadîya Rayberîye û dewam bikero. Cinîyî do seba cuya azade û demokratîke têkoşîn bikerê, vera zulmî sereyê xo nêarê war. Cinîyî do sey her wextî bi ruhê Newroze û serewedaritişî bibê serkêşê têkoşînî.

Ma ancî wina hêvî kenê ke na Newroze wa biba Newroza azadîya Rayber Apoyî û Newroza pêro cinîyan, ciwanan, şarê ma û embazan fîraz kenê.’’