Koordînasyonê Partîya Azadîya Cinîyan ê Kurdîstanî (PAJK) bi wesîleya serrgêra Qirkerdişê Parisî eşkerayîyêke weşanaye.

Eşkerayîye wina ya:

''Ma serra newîye ya têkoşînî de reyna bi xurtî Qirkerdişê Parisî şermezar kenê. Ma soz danê ke heta ke mesuldarê nê qirkerdişî bêrê cezakerdene ma do asta berze de bêmabên têkoşînê xo dewam bikerê û cuya azade awan bikerê. Şexsê hemra Sara de ma pêro şehîdanê şorişê bi rêzdarî û minetî yad kenê, pê qerardarîya xo dibare kenê ke ma do bibê layîqê vîrameyîşê înan.

Hêrişê vera Sara fermanê qirkerdişê pêro cinîyan o

Hêrişo ke vera pîra cinîyan ê elewîyan, raybera cinîyan ê xoverdayoxan hemra Sara ame kerdene, komployêk bi. Coka Rayber Apoyî no hêriş seke vera ci ameyo kerdene dî. Hêrişê vera Sara fermanê qirkerdişê pêro cinîyan bi. Naye ra nê hêrişî ra dima cade konseptê hêrişê vera cinîyan kewt dewre, vera tradîsyon û kulturê cinîyan planî kewtî dewre. Qirkerdişê cinîyan, hêrişê îşxalî yê vera erdê ma, tecawuzê cinîyan, vêşnayîş û çinkerdişê înan hêrişê vera embaze Sara ra cîya nîyê.

Qirkerdişê cinîyan, hêrişanê bêperwayan ê sîstemî yê 7 serranê peyênan mojna ke hêrişê vera cinîyan ê xoverdayoxan hêrişê vera pêro cinîyan ê û pê qirkerdişê cinîyan gama verêne ya koledarîya komelî erzîyaye.

La xoverdayîşê cinîyan ê vera faşîzmî û serdestîya camêrdan morê xo da binê nê dewrî ro û hewn û xeyalê faşîzmî çin kerdî. Dinya do pê destê cinîyan ê xoverdayox û azadan bivurîya. Sere de cinîyê kurdî cinîyê şorişgêr û cinîyê pêro dinya pê tecrubeyanê xo na raştîye ancî mojnenê.

'Qirewtişê qesasê înan armancê ma yo verên o'

Girewtişê qesasê hemra Sara armanco verên ê PAJKî yo. Qesasê hemra Sara pê azadîya cinîyan eşkîyeno bêro girewtene. Cuya ke tede qet yew cinîye nêkişîyena, cinîyî nênê astengkerdene, benê rayber na cuye cuya azad a. Wexto ke na cuye bêra awankerdene qesasê Sara zî do bêro girewtene. Seba ke no armanc bêro caardene xoverdayîş û têkoşîn do heta serkewtişî dewam bikerê.

Serra 8. ya şehadetê hemra Sara, Rojbîne û Ronahî de ma şehîdanê xo yê çeleyî, rayberanê xo yê ke xoverdayîşê xoîdarekerdişî de ameyî qetilkerdene Sêvê, Pakîzê û Fatma yad kenê û verê vîrameyîşê înan de rîyê xo bi heskerdiş û minetî anê war. Şorişê Vakurî rayberîya cinîyan de yo û qetî do ser bikewo. Faşîzm her gama xo de îsbat keno ke cinîyan ra terseno û coka cinîyan qetil keno. Pîlkerdişê xoverdayîşî û xurtkerdişê qerardarîya serkewtişî ra çîyêk nêeşkeno verê nê hêrişan bigêro.

Ma sozê xo yê seba şehîdan dibare kenê. Ma do faşîzmî birijnê, cuya azade awan bikerê û pê azadkerdişê Rayberîye qesasê xo serdestan ra bigêrê. Ma venga cinîyanê xo, cinîyanê Rojhelatê Mîyanênî û merdimîye danê ke rayberîya PKK û PAJKî de bi ruhê xoverdayîşî tewrê hemleya ma bibê, her ca de û mîyanê pêro şert û mercan de çalakîyan bikerê, faşîzm birijnê û cuya azade awan bikerê.''