9ê çeleyê 2013î de ronayoxa PKKyî Sakîne Cansiz (Sara), Temsîlkara KNKyî ya Parisî Fîdane Dogan (Rojbîne) û Endama Têgêrayîşê Ciwanan Leyla Şaylemez (Ronahî) Paris de ameybî qetilkerdene.

3 cinîyê kurdî vizêr Paris de hetê bi hezaran kesan ra ameyî yadkerdene. Dezgehê Kurdîstanî, Têgêrayîşê Cinîyan ê Kurdan, Temsîlkarê Dezgehanê Kurdan û dostê kurdan tewrê yadkerdişî bîyî.

Merasîmê yadkerdişî bi sloganê “Stop Erdogan, Terorîst Erdogan”, “Sara, Rojbîn, Ronahî”, ''Cinîye, Cuye, Azadîye'' pê rayraşîyayîşêkî dest pêkerd.

Çalakîkera pankartê ke serê înan de fotografê Sara, Rojbîne û Ronahî estbî akerdî. Meydanê Republique de rayraşîyayîş vurîya nawnayîş. Nawnayîş de pê merşê Ey Reqîbî çalakîkeran 3 deqayan çalakîya roniştişî kerde.

Nawnayîş de mesajanê keyeyanê Sara û Rojbîne goştarî bîyî û xeylêk dezgehan qisey kerd. Qiseykerdişan de dîya zanayene ke fermanê Qirkerdişê Parisî hetê Erdoganî ra dîyayo.

Nawnayîşê pê deyîranê TEV-ÇANDî qedîya.